რა ავტომანქანით და რა გზით მოხვდა საქართველოში შსს-ს მიერ დაკავებული 3 ტონა თხევადი ჰეროინი

სამართალი - 17:30, 02 Feb, 2015

1910

2014 წლის ივლისში საბაჟო ტერმინალ „ბათუმში“ 3 ტონამდე თხევადი ჰეროინის დაკავებასთან დაკავშირებით ახალი დეტალები ხდება ცნობილი. აზერბაიჯანის საბაჟო სამსახურის მიერ გავრცელებული ინფორმაციის თანახმად სატვირთო მანქანა, რომელშიც დიდი რაოდენობით ნარკოტიკი აღმოჩნდა, საქართველოში აზერბაიჯანის ტერიტორიიდან არ შესულა.

საბაჟო კომიტეტის საგამოძიებო განყოფილების ხელმძღვანელის ულვი ზულფუგაროვის თქმით, საქართველოში სხვა სატვირთო დააკავეს, რომელსაც ერთ-ერთი ეჭვმიტანილი ევგენი გორგაძე მართავდა. გამოძიების ცნობით, გორგაძე აზერბაიჯანის ტერიტორიაზე ინციდენტამდე რამდენიმე კვირით ადრე იმყოფებოდა და მაშინ მერსედესის მარკის ავტომანქანას მართავდა, თხევადი ჰეროინი კი DAF-ის მარკის სატვირთოში აღმოჩნდა. "ასე რომ, მანქანა, რომელმაც აზერბაიჯანზე გაიარა და ავტომანქანა, რომელიც ბათუმში იქნა დაკავებული, სხვადასხვა სატრასპორტო საშუალებაა და შესაბამისად, საუბარი იმაზე, რომ ნარკოტიკებით დატვირთულმა მანქანამ აზერბაიჯანზე გაიარა, უსაფუძვლოა,” - აცხადებს ზულფუგაროვი.

ჰეროინის საქმეზე დაკავებული მძღოლი გელა ცეცხლაძის განცხადებით კი ავტომანქანა ნამდვილად აზერბაიჯანის ტერიტორიიდან მოხვდა საქართველოში.