ე.წ კორტების სპეცოპერაციის დროს საკონტროლო გასროლები გიორგი ცააძემ განახორციელა- პროკურატურა

სამართალი - 15:45, 02 Feb, 2015

1781

მთავარი პროკურატურის მიერ გავრცელებული ინფორმაცის თანახმად, საკონტროლო გასროლები ზურაბ ვაზაგაშვილისა და ალექსანდრე ხუბულოვის მისამართით, ე.წ კორტების სპეცოპერაციის დროს კრიმინალური პოლიციის დეპარტამენტის სამძებრო სამმართველოს უფროსის ყოფილმა მოადგილემ გიორგი ცააძემ განახორციელა.

ამის შესახებ პროკურატურაში სპეციალურ ბრიფინგზე განაცხადეს, სადაც 2006 წლის ე.წ კორტების სპეცოპერაციის საქმე გახსნილად გამოცხადდა.

„ინტენსიური სროლის შეწყვეტისთანავე, ე.წ. „სპეცოპერაციის“ მონაწილე, კრიმინალური პოლიციის დეპარტამენტის სამძებრო სამმართველოს უფროსის მოადგილე გიორგი ცააძე, წინასწარ შემუშავებული გეგმის თანახმად, ირაკლი ფირცხალვას მიერ ორგანიზებული დანაშაულის დაფარვის, თვითმხილველი მოწმეების განადგურების და წარმატებული ოპერაციის დასრულებაში დარწუნების მიზნით, მიუახლოვდა ზურაბ ვაზაგაშვილის მართვის ქვეშ მყოფ ავტომობილს და თანნაქონი ცეცხლსასროლი იარაღიდან მოახდინა საკონტროლო გასროლები, სალონის წინა ნაწილში მჯდომი ზურაბ ვაზაგაშვილისა და ალექსანდრე ხუბულოვის მისამართით“,- აცხადებს პროკურატურა.

უწყების ინფორმაციით, ჩატარებული ექსპერტიზებით დადგენილია, რომ ვაზაგაშვილის ავტომანქანის მიმართულებით ასზე მეტი გასროლა მოხდა, მათივე ცნობით, ზურაბ ვაზაგაშვილს სხეულზე აღენიშნებოდა 8 ცეცხლსასროლი ჭრილობა; ალექსანდრე ხუბულოვს კი, 9 ცეცხსასროლი ჭრილობა; მრავლობითი ჭრილობები აღენიშნებოდა ასევე ბონდო ფუთურიძესაც.

„მიყენებული ჭრილობების შედეგად ზურაბ ვაზაგაშვილი და ალექსანდრე ხუბულოვი ადგილზევე გარდაიცვალნენ, ხოლო ბონდო ფუთურიძემ მიიღო სიცოცხლისათვის საშიში მძიმე ხარისხის დაზიანება“,- განაცხადეს პროკურატურაში.