ბევრჯერ მიფიქრია ვაზაგაშვილის ოჯახის წევრებთან შეხვედრაზე, რომ სიმართლე მეთქვა- ოთარ მირზოევი

სამართალი - 11:02, 02 Feb, 2015

4605

კრიმინალური პოლიციის დეპარტამენტის უფროსის ყოფილი მოადგილე ოთარ მირზოევი იური ვაზაგაშვილის მკვლელობის ფაქტის შეფასებისგან თავს იკავებს და აცხადებს, რომ მკვლელობის დღეს სამსახურში იმყოფებოდა.

როგორც მირზოევი გაზეთ „კვირის პალიტრასთან“ ინტერვიუში აცხადებს, ნანობს, რომ მკვლელობამდე თანამდებობა არ დატოვა.

„ისიც კი არ ვიცოდი ზურაბ ვაზაგაშვილი კასპში რომ იყო დასაფლავებული. ვნანობ, სანამ იური ვაზაგაშვილი დაიღუპებოდა, მანამდე რატომ არ წავედი თანამდებობიდან. სალაპარაკო არ გახდებოდა, რომ მაღალ თანამდებობაზე ვიყავი. არსად მივდივარ. თუ საჭიროდ ჩათვლიან და დანაშაულს დამიმტკიცებენ, დამაკავონ. მე ის ვიცი, რომ არაფერი დამიშავებია“, - განაცხადა ოთარ მირზოევმა.

მისივე თქმით, აღნიშნულ საქმეზე შს მაშინდელ მინისტრ ალექსანდრე ჭიკაიძეს შეხვდა, რომელსაც მირზოევის განცხადებით, ყველაფერი მოუყვა. თავის მხრივ, ჭიკაიძემ თანამდებობაზე დარჩენა და გამოძიების დასრულებაზე დალოდება შესთავაზა.

„ჭიკაიძე თავმოყვარე კაცია და თანამდებობიდან წასვლით სწორი ნაბიჯი გადადგა. ნეტავ მაგისთანა წესიერი ადამიანი ბევრი იყოს. იმედი მაქვს, რომ მამა-შვილის საქმე გაიხსნება. ბევრჯერ მიფიქრია ვაზაგაშვილის ოჯახის წევრებთან შეხვედრაზე, რომ სიმართლე მეთქვა, მაგრამ კოლეგები იკავებდნენ თავს, მეუბნებოდნენ, არ შეიძლება ჩვენგან არ გამოვაო“, - აცხადებს ოთარ მირზოევი.

ამასთან, მისივე მტკიცებით, ის ე.წ. კორტების სპეცოპერაციისას შემთხვევის ადგილს იცავდა და მას ზურაბ ვაზაგაშვილის მიმართულებით არ უსვრია.

„იური ვაზაგაშვილი თავიდან ამბობდა ჩემზე, მკვლელიაო, მერე თქვა, მკვლელობის მონაწილეა და ჩემს შვილს დალაქიშვილმა ესროლაო. რამდენიმე დღის წინ კი, წერილი გამოაქვეყნეს, სადაც ვაზაგაშვილი ამბობს, პირველად მირზოევმა გაისროლაო, რაც აბსურდია“, - აღნიშნა მირზოევმა.