ემზარ კვიციანს მიხეილ სააკაშვილის წინააღმდეგ სარჩელი შეაქვს

სამართალი - 14:46, 30 Jan, 2015

2036

ემზარ კვიციანი მიხეილ სააკაშვილის წინააღმდეგ სამართლებრივი დავას იწყებს. როგორც ემზარ კვიციანმა პრესკონფერენციაზე განაცხადა, მისი ადვოკატები სარჩელს უკვე ამზადებენ ,რომლის მიხედვითაც საქართველოს მესამე პრეზიდენტს სისხლის სამართლის ორი მუხლით- 73-ე და 100-ე მუხლებით უჩივლებს.

"უმაღლეს მთავარსარდალს არ ჰქონდა ჯარების გადაადგილების უფლება პარლამენტის ნებართვის გარეშე. მაშინ 2006 წელს სააკაშვილმა დანაშაულებრივი გადაწყვეტილება მიიღო კოდორის ხეობაში ჯარის შეყვანისა და ხეობის მოსახლეობაზე ძალის გამოყენების შესახებ", - განაცხადა ემზარ კვიციანმა.

მისივე თქმით, 2006 წელს მოხდა ნიადაგის შემზადება, რათა ქართულ მხარეს სამომავლოდ შეძლებოდა კოდორის ხეობის რუსული მხარისათვის გადაცემა. ემზარ კვიციანის ინფორმაციით, მან იცოდა, რომ კოდორის ხეობაში ჯარის შეყვანით, კოდორის ხეობა დაიკარგებოდა.

"ხეობაში ჯარის შემოყვანა არ შეიძლებოდა. მე ვიცოდი, რომ ჯარს შემოიყვანდნენ, მერე ჯარი მიატოვებდა იქაურობას და ჩააბარებდნენ ხეობას რუსეთს", - განაცხადა კოდორის ხეობაში პრეზიდენტის ყოფილმა რწმუნებულმა. მისივე თქმით, 2008 წელი იყო ქვეყნის ღალატის კოლექტიური ქმედება რაც აუცილებლად უნდა დაისაჯოს.

ემზარ კვიციანს ზუგდიდის სასამართლომ უკანონო გასამხედროებული ჯგუფის შექმნისა და 2006 წელს კოდორის ხეობაში ამბოხის მოწყობისათვის დამნაშავედ სცნო და 12-წლიანი თავისუფლების აღკვეთა შეუფარდა. განაჩენი მისმა ადვოკატებმა გაასაჩივრეს. 28 იანვარს ქუთაისის სააპელაციო სასამართლომ კვიციანი გაათავისუფლა.