პოლიციელთა სიცოცხლეს რეალური საფრთხე ემუქრება- „სამართალდამცავთა დაცვის ლიგა“

სამართალი - 17:31, 29 Jan, 2015

2645

„სამართალდამცავთა დაცვის ლიგა“ უჩა ნანუაშვილს მიმართავს და მედიაში გავრცელებულ ე.წ კორტების სპეცოპერაციაში მონაწილე სამართალდამცველთა სიასთან დაკავშირებით რეაგირებისკენ მოუწოდებს, „სამართალდამცავთა დაცვის ლიგის“ განცხადებით ამ სიის გამოქვეყნებით დაირღვა უდანაშაულობის პრეზუმფცია, ხოლო სიაში არსებული პირების მიმართ რეპრესიები მიმდინარეობს, "ნიუპოსტი" აღნიშნულ განცხადებას უცვლელად გთავაზობთ:

"ბატონო უჩა, ჩვენთვის ცნობილი გახდა, რომ მასმედით გავრცელდა ე.წ კორტების სპეცოპერაციაში მონაწილე სამართალდამცველთა სრული სია, მათი იმჟამინდელი თანამდებობებისა და პიროვნებების იდენტიფიცირების მითითებით, რაც ჩვენს სამართლიან შეშფოთებას იწვევს. დარღვევულია უდანაშაულობის პრეზუმფცია. ამ პირების მიმართ მიმდინარეობს რეპრესიები, რომელიც გამოიხატება შემდეგში: ამჟამად შინაგან საქმეთა სამინისტროში დასაქმებულ პოლიციელებს სამინისტროს გენერალურ ინსპექციაში იძულებით აწერინებენ პატაკებს ორგანოდან დათხოვნის თაობაზე და კატეგორიულად უკრძალავენ თარიღის მითითებას. პროცესს პროკურატურის წარმომადგენელი ესწრება, შემდეგ კი , შსს გენერალური ინსპექციის თანამშრომლებს პოლიციელები მთავარ პროკურატურაში გადაყავთ. პოლიციელთა დაკითხვა ადვოკატების გარეშე მიმდინარეობს, აუცილებელ პირობად უყენებენ მათთვის სასურველი ჩვენების მიცემას, რის შემდგომაც ისინი შეინარჩუნებენ თანამდებობებს, წინააღმდეგ შემთხვევაში მათი პატაკები იქნება დაკმაყოფილებული.

იმ თანამშრომლებს, კი რომლებიც უკვე გათავისუფლებულები არიან შინაგან საქმეთა სამინისტროდან სასურველი ჩვენების სანაცვლოდ სთავაზობენ დასაქმებას მაღალანაზღაურებად სამსახურებში.

შეშფოთებას იწვევს, რომ ე.წ „დაკითხვებს“ არ ასწრებენ ადვოკატებს, რაც წინააღმდეგობაში მოდის: 1) საერთაშორისო სამართლით აღიარებულ პრინციპებთან; 2) ადამიანის ძირითად უფლებებსა და თავისუფლებებთან; 3) პროკურატურის იმ განცხადებასთან, რომ აღნიშნულ საკითხზე გამოძიება გამჭვირვალედ ჩატარდებოდა.

ბატონო უჩა, გთხოვთ მოახდინოთ სასწრაფო რეაგირება და საჯარო გამოსვლით დააფიქსიროთ თქვენი პოზიცია, იმ პოლიციელთა სიცოცხლეს, რომელთა ვინაობაც გასაჯაროებულია რეალური საფრთხე ემუქრება."- აღნიშნულია „სამართალდამცავთა დაცვის ლიგის“ განცხადებაში.