მედიაში დღეს გავრცელებულ ვიდეოსთან დაკავშირებით, კომენტარი გააკეთა საპატრულო პოლიციის დეპარტამენტის დირექტორის მოადგილე ლევან მაჭავარიანმა, რომელმაც განაცხადა, რომ აღნიშნული კადრები გადაღებულია 2013 წლის ივნისში, ქალაქ ბორჯომში და პირი, რომელიც კადრებში ჩანს, საპატრულო პოლიციის ეკიპაჟმა კანონის შესაბამისად ადმისტრაციული წესით დააკავა და დააჯარიმა.

ლევან მაჭავარიანის განცხადებით, ინფორმაცია იმის თაობაზე, რომ თითქოს-და ამ შემთხვევის გამო საპატრულო პოლიციის თანამშრომელი სამსახურიდან გათავისუფლდა, არ შეესაბამება სიმართლეს. მისი განცხადებით გიორგი ლომსაძემ საპატრულო პოლიცია პირადი განცხადებით დატოვა, ხოლო მისი მეწყვილე დავით გვიმრაძე დაწინაურდა და დღემდე აგრძელებს მუშაობას საპატრულო პოლიციაში.

"კადრებში ასახული შემთხვევა 2013 წლის ივნისში მოხდა. აღნიშნული პიროვნება იმ დღეს იქნა დაკავებული და ადმინისტრაციული წესით დაჯარიმებული. რაც შეეხება საპატრულო პოლიციის თანამშრომლებს, ერთ-ერთი თანაშრომელი დავით გვიმრაძე შემდგომში იქნა დაწინაურებული და დღესაც წარმატებით მუშაობს საპატრულო პოლიციაში. რაც შეეხება ეკიპაჟის მეორე წევრს, გიორგი ლომსაძეს, მან ამ ფაქტის შემდეგ კიდევ წელიწადი იმუშავა საპატრულო პოლიციაში და ერთი თვის წინ საკუთარი ნებით დატოვა პოლიცია“, - განაცხადა მაჭავარიანმა.