სახალხო დამცველის განცხადებასთან დაკავშირებით პროკურატურამ გამოძიება დაიწყო

სამართალი - 20:22, 27 Jan, 2015

1603

ომბუდსმენის მიერ საქართველოს მთავარ პროკურატურაში გაგზავნილი წერილის საფუძველზე, ქალაქ თბილისის პროკურატურის საგამოძიებო ნაწილში დაიწყო გამოძიება სისხლის სამართლის საქმეზე, განზრახ დამამძიმებელ გარემოებებში მკვლელობის მომზადებისა და სამსახურებრივი უფლებამოსილების გადამეტების ფაქტზე.

„კერძოდ: საქართველოს შინაგან საქმეთა სამინისტროს იმდროინდელმა მაღალჩინოსნებმა ირაკლი ფირცხალავამ, კახა ლეგაშვილმა, გიორგი ხიზანიშვილმა და გიორგი ჭანტურიამ, 2008 წლის ივლისში გადაამეტეს რა სამსახურებრივ უფლებამოსილებას, დააკავეს მოქალაქე ლაშა შავიძე და მასზე ფსიქიკური ზეწოლის მოხდენის და ნარკოტიკული ნივთიერების გადაცემის გზით, თავისუფლების სანაცვლოდ დაიყოლიეს ბუტა რობაქიძის დედის - ია მეტრეველის განზრახ მკვლელობაზე“, - ნათქვამია პროკურატურის მიერ გავრცელებულ განცხადებაში.

გამოძიება დაწყებულია სსკ-ის 18,109-ე მესამე ნაწილის „გ“ და „ვ“ ქვეპუნქტებით და 333-ე მუხლის პირველი ნაწილით.

შეგახსენებთ, სახალხო დამცველმა, უჩა ნანუაშვილმა დღეს განაცხადა, რომ მსჯავრდებული ლ.შ. აცხადებს, რომ მას ირაკლი ფირცხალავა ნარკოტიკული დანაშაულით პასუხისგებაში მიცემით დაემუქრა, ხოლო თავისუფლების სანაცვლოდ, გარდაცვლილი ბუტა რობაქიძის დედა, ია მეტრეველი უნდა მოეკლა.