იური ვაზაგაშვილის აფეთქება იუსტიციის სახლთან იგეგმებოდა. ინფორმაციას გაზეთი „პრაიმტაიმი“ ავრცელებს. გამოცემის ცნობით, ყარაფილაში მომხდარი აფეთქების შემდეგ სამართალდამცავები ასაფეთქებელ მოწყობილობას სწორედ ამ მემორიალთან ეძებდნენ.

„ადგილზე კინოლოგთა ჯგუფი სპეციალურად გაწვრთნილი ძაღლებით მუშაობდა, თუმცა უცნობია, იპოვეს თუ არა ზურაბ ვაზაგაშვილის მემორიალთან ნაღმი. საგამოძიებო უწყებები, კომენტარს არ აკეთებენ, თუმცა, თუ იუსტიციის სახლთან ნაღმის არსებობა დადასტურდა, არ არის გამორიცხული, რომ იური ვაზაგაშვილის აფეთქება სწორედ იქ, ქალაქის ცენტრში იგეგმებოდა. მკვლელს, რომელმაც ზუსტად იცოდა იური ვაზაგაშვილის შვილის საფლავზე გასვლის პერიოდულობა, სავარაუდოდ, ისიც ეცოდინებოდა, რომ ის საკმაოდ ხშირად სტუმრობდა ამ მემორიალს“, - წერს „პრაიმტაიმი“.

ვაზაგაშვილის აფეთქების დღეს იუსტიციის სახლთან კინოლოგების მუშაობის შესახებ ინფორმირებულია კრიმინალური პოლიციის ყოფილი უფროსი ირაკლი ფირცხალავაც.

„მე მაქვს ინფორმაცია, რომ იუსტიციის სახლთან, სადაც თეა წულუკიანმა მემორიალი გაუხსნა ზურაბ ვაზაგაშვილს, მუშაობდნენ კინოლოგები, მიყვანილი ჰყავდათ ძაღლები და ეძებდნენ ნაღმს. ფაქტია, რომ ეს არ არის უბრალოდ კრიმინალი, ეს გაცილებით სერიოზულ შედეგზე იყო გათვლილი, ვიდრე ერთი პიროვნების ლიკვიდაციაა“, - ამბობს ფირცხალავა გამოცემასთან საუბრისას.