გოგა ხეტეშვილი: პოლიციელმა იმდენი მირტყა, გონება დავკარგე

სამართალი - 17:02, 23 Jan, 2013

1546

მისი თქმით, ფიზიკური შეყრაცხყოფის შედეგად მან გონება დაკარგა, რის გამოც საავადმყოფოში გადაყვანა დასჭირდა.„უცხო ნომრით დამირეკა უცნობმა პირმა და მითხრა, საავადმყოფოს ეზოში მოდი, ჭანდარში უნდა წაგიყვანოთ, გარდაცვლილის ბალზამირება გვჭირდებაო. საავადმყოფოს ეზოში რომ მივედი, დავინახე ფორმის გარეშე იყო პოლიციელი ვანო დულარიძე. მეორე, ფორმიანი მოვიდა, მართვის მოწმობა მომეციო, არ მაქვს მეთქი. გახსნა ვანო დულარიძემ პიკაპის მარკის მანქანის უკანა კარი, კისერში მტაცა ხელი და ჩამსვა. თვითონ წინ დაჯდა, ხელი გადმოყო და მუშტს თავში მირტყამდა, საავადმყოფოდან პოლიციის ეზომდე თავში მირტყამდა, მაგინებდა და შეურაცხყოფას მაყენებდა. თან მეუბნებოდა, ისე უნდა გირტყა, რომ არ დაგეტყოსო,“ – განუცხადა გოგა ხეტეშვილმა კახეთის საინფორმაციო ცენტრს.

მისივე თქმით, პოლიციის თანამშრომელი მას ეთნიკური ნიშნით შეურაცხყოფდა. გოგა ხეტეშვილი ეროვნებით ოსია.

„მერე ამიყვანეს პოლიციაში. ვანო დულარიძემ უთხრა პოლიციელებს, ნარკოლოგიურში წავიყვანოთ, იქნებ პლანიც აღმოაჩნდეს და კიდევ 500 ლარი ჯარიმა გადავახდევინოო. შემოწმების შედეგად არაფერი არ აღმომაჩნდა და უკან წამომიყვანეს. ბადრაგს ვუთხარი, იმდენი მირტყა ვანომ თავში, რომ ცუდად ვარ, თან შაქარი მაქვს, თქვენ კიდევ არც ინსულინი გამაკეთებინეთ, არც მაჭამეთ და ცუდად ვარ მეთქი. მართლაც გონება დავკარგე. გონზე რომ მოვედი, საავადმყოფოში ვიყავი. თავზე სისხლჩაქცევები მქონდა“, – აღნიშნა გოგა ხეტეშვილმა.

მომხდარზე რეაგირებისათვის მან განცხადებით კახეთის საოლქო პროკურატურას მიმართა. გამოძიება დაიწყო, მაგრამ ვანო დულარიძე ამ დრომდე პოლიციაში აგრძელებს მუშაობას.

კახეთის საინფორმაციო ცენტრს გურჯაანის სამედიცინო ცენტრში დაუდასტურეს, რომ გოგა ხეტეშვილი საავადმყოფოში მართლაც მოათავსეს და ის სტაციონარში შეყვანის მომენტისთვის უგონო მდგომარეობაში იყო.