ზურაბ ჟვანიას დაცვის ყოფილი უფროსი, კობა ხაშილაძე ყოფილი პრემიერის გარდაცვალების მომენტს იხსენებს და მისი და მიხეილ ძაძამიას მიერ შემუშავებულ გეგმას ამხელს.

როგორც მან დღევანდელ სასამართლო პროცესზე განაცხადა, იმ დროს შემთხვევის ადგილზე არაორდინალური სიტუაცია იყო, რის გამოც მან და ძაძამიამ, უსუპოვის ცხედრის ბინიდან გატანა გადაწყვიტეს.

„რაულ უსუპოვის ცხედარი მე და მიხეილ ძაძამიამ გავიტანეთ ბინიდან და ჩავდეთ მანქანაში. შემდეგ მივხდი, რომ ეს იყო აბსურდული გეგმა და ცხედარი ისევ უკან შევიტანეთ. ფეხსაცმელი, სავარაუდოდ, ამ გატანის დროს გაძვრა და ასევე შარვალიც, სავარაუდოდ ამ დროს დაესვარა. ამ ყველაფრის შემდეგ დავრეკე გიორგი ბარამიძესთან და მომხდარის შესახებ შევატყობინე. მან პრეზიდენტს აცნობა ამის შესახებ“, - ამბობს ხარშილაძე.

ის ასევე იხსენებს, თუ როგორ გაიგო თავად ამ ამბის შესახებ.

„სახლში ვიყავი, დამირეკა მიხეილ ძაძამიამ და მითხრა, რომ ზურა იყო უგონო მდგომარეობაში. გავემართე შემთხვევის ადგილზე, თუმცა გზაზე მანქანა გამიფუჭდა. ამის შემდეგ ბინიდან მოშორებით მომაკითხა ძაძამიამ და შემთხვევის ადგილზე მიმიყვანა. როდესაც მივედი, ფანჯრიდან დავინახე, რომ ბატონი პრემიერი უგონოდ გამოიყურებოდა“, - განაცხადა ხარშილაძემ.