გარდაცვლილი ეროსი კიწმარიშვილის ძმა ზურაბ კიწმარიშვილი დარწმუნებულია, რომ მისი ძმა მოკლეს და იმედოვნებს, რომ საქმე კვალიფიკაციას შეიცვლის.

ამის შესახებ კიწმარიშვილმა „კვირის პალიტრასთან“ ინტერვიუში განაცხადა.

„ეს თვითმკვლელობა არ ყოფილა. ემოციურ მომენტებს რომ გვერდი ავუაროთ, ვერ ვხედავ მთავარს - მოტივს. ეროსი ავადმყოფი და დეპრესიული ადამიანი არ იყო. ცხოვრებაში ბევრად მძიმე პერიოდები ჰქონია და ახლა არც ისეთ ჩიხში იყო, საიდანაც ვერ გამოვიდოდა... "რუსთავი 2"-ს როცა ხელმძღვანელობდა, ბევრჯერ უფიქრია, რომ შესაძლოა, ვინმეს მისი ლიკვიდაცია შეეკვეთა. მაშინ მსგავსი რამ რომ მომხდარიყო, ეს იქნებოდა სახელისუფლებო კლანების ქმედება, რასაც მოჰყვებოდა მოვლენები, რომლებიც ბევრ პოლიტიკურ ფიგურას გადაიყოლებდა. ამიტომ უთქვამს, გონიერება ეყოფათ, ეს არ გააკეთონო. ამიტომაც არ ჰყავდა დაცვა და არც იარაღის ტარების სურვილი გასჩენია ოდესმე“, - აცხადებს კიწმარიშვილი.

მისი თქმით, ეროსი კიწმარიშვილმა თავს დაცვა მას შემდეგ გადაწყვიტა, რაც პოლიტიკაში ჩაება.

„ეროსიმ ღიად დაიწყო თამაში, თვითმმართველობის არჩევნებში მიიღო მონაწილეობა და, ასე ვთქვათ, ხელთათმანი ესროლა "ნაციონალებსაც" და ხელისუფლებასაც, ამიტომაც გადაწყვიტა, თავად დაეცვა თავი. ცდილობდა, შეექმნა პატარა მოდელი იმისა, თუ როგორ შეიძლება რეგიონის მასშტაბით გათავისუფლდე ჯგუფური პოლიტიკური მიმართულებებისგან, იყო ლიდერი, მენეჯერი და წარმატებით შეასრულო ამოცანები. ამის მისაღწევად თანამშრომლობდა ისეთ პირებთან, რომლებიც ამ ნიშნით იყვნენ თავისუფლები“, - განაცხადა კიწმარიშვილმა.

„რუსთავი 2“-ის დამფუძვნებლის ძმა არ გამორიცხავს, რომ ეროსი კიწმარიშვილი ვიღაცას საფრთხეს უქმნიდა და სწორედ ამიტომ მოიშორეს ის თავიდან.

„ვის უქმნიდა საფრთხეს ქვეყნის შიგნით თუ გარეთ, რთულია ამაზე მსჯელობა, რეალური ვერსია არ არის გამოკვეთილი. თუმცა, არ გამოვრიცხავ, ეს ყოფილიყო ქვეყანაში მყოფი პოლიტიკური პლასტი, რომელმაც ყველაფერი დაგეგმა, ან შესაძლოა, აქაურებთან კოორდინაციაში მყოფი ძალა ქვეყნის გარედან. ეროსი ვიღაცებს აღიზიანებდა თავისი გეგმებით“, - ამბობს კიწმარიშვილი.