აშშ-სა და ჩრდილოეთ კორეას შორის 18 იანვარს, სინგაპურში, არაოფიციალური მოლაპარაკებები მიმდინარეობს. მოლაპარაკებათა თემა ჩრდილო კორეის ბირთვული პროგრამაა.

ამერიკის დელეგაციას ყოფილი მაღალჩინოსნები და ჩრდილო კორეის საკითხების სპეციალისტები შეადგენენ, ხოლო კორეის მხრიდან დელეგაციას ბირთვული საკითხების კურატორი ლი იუნ ხო ხელმძღვანელობს.

მიუხედავად დიპლომატიური ურთიერთობების არარსებობისა, მსგავსი შეხვედრები ორი ქვეყნის წარმომადგენლებს შორის ხშირად იმართება.

როგორც ცნობილია რამოდენიმე დღის წინ ჩრდილოეთ კორეამ შესთავაზა ვაშინგტონს გაეუქმებინა ერთობლივი სწავლება სამხრეთ კორეის სამხედრო ნაწილებთან ერთად, რის სანაცვლოდაც იგი შეაჩერებდა ბირთვულ გამოცდებს. ვაშინგტონმა ეს წინადადება კატეგორიულად უარყო.