გიუმრიში მომხდარმა ტრაგედიამ სომხეთ-რუსეთის ურთიერთობაში გარკვეული დაძაბულობა შეიტანა. ავეტისიანების ოჯახის ექვსი წევრის რუსი ჯარისკაცის მიერ დახოცვა ქვეყანაში საპროტესტო გამოსვლების მიზეზი გახდა. ამ მოვლენამ პოლიტიკური დისკუსიების და იმ ძალების გააქტიურება გამოიწვია, რომლებიც სომხეთის ტერიტორიიდან სამხედრო ბაზების გაყვანას და ქვეყნის ევროინტეგრაციას უჭერენ მხარს.

„უსაფრთხოების საკითხებში ურთიერთობამ ქვეყნები იქამდე მიიყვანა, რომ საძინებლებშიც არ ვართ უსაფრთხოდ“- აცხადებს ერევნელი ექსპერტი რადიო „თავისუფლებასთან“ საუბარში.

სამოქალაქო აქტივისტი, რეჟისორი ტიგრან ხაზმალიანის თქმით „მოკლულია არა მხოლოდ სომხური ოჯახი, არამედ მოკლულია ადამიანების რწმენა რომ რუსეთი ჩვენი დამოუკიდებლობის გარანტი და დამცველია, საზოგადოება მიხვდა , რომ კვლავ ერთი-ერთზე ვართ საკუთარ პრობლემებთან. არ გამოვრიცხავ , რომ ამ მოვლენებმა სომხეთში სერიოზული პოლიტიკური ცვლილებები გამოიწვიოს. რაც შეეხება გიუმრის ბაზას, თავის დროზე რუსეთმა ხელში ჩაიგდო ჩვენი ქვეყნის ენერგეტიკა, ტრანსპორტი, კავშირგაბმულობა. სწორედ ეკონომიკური და პოლიტიკური ინტერესების დაცვას ემსახურება სამხედრო ბაზა და არა ჩვენს დაცვას“- აცხადებს ხაზმალიანი "იმედის" ჟურნალისტთან საუბარში.