„სამოქალაქო ჩართულობის ცენტრი“ მსჯავრდებულების მიმართ არაადამიანური მოპყრობაზე საუბრობს

სამართალი - 18:23, 17 Jan, 2015

2048

სამოქალაქო ჩართულობის ცენტრის“ (CCI) აღმასრულებელი დირექტორი ნათია გურული სასჯელაღსრულების #7 დაწესებულებაში განთავსებული მსჯავრდებულების შიმშილობისა და მათ მიმართ არსებულ არაადამიანური მოპყრობის ფაქტებზე საუბრობს.

ნათია გურული ამბობს, რომ აღნიშნულ დაწესებულებაში მოთავსებული მსჯავრდებულები არასათანადო და გაუსაძლის პირობებში არიან.

„თავისუფლებააღკვეთილი პირები უკვე თვეებია, სასჯელაღსრულების #7 დაწესებულებაში ადმინისტრაციის მხრიდან განხორციელებულ ფსიქიკურ ზეწოლაზე საუბრობენ, რაც სამედიცინო მომსახურების არარსებობაში, ანტისანიტარულ პირობებსა თუ სასმელი წყლის მიუწოდებლობაში გამოიხატება. ამის გამო, 13 იანვარს, პატიმრებმა პროტესტის უკიდურეს ფორმას მიმართეს, თუმცა ქმედითი ნაბიჯები სიტუაციის გაუმჯობესებისკენ არ გადადგმულა“, - განაცხადა ნათია გურულმა.

მისივე თქმით, გარდაცვლილი პატიმრების რაოდენობა და გახშირებული საუბრები ციხის ადმინისტრაციის მხრიდან პატიმრებზე ზეწოლის შესახებ მოწმობს, რომ სასჯელაღსრულების დაწესებულება მსჯავრდებულების ფუნდამენტური უფლებების დაცვას ვერ უზრუნველყოფს.

ნათია გურულმა სასჯელაღსრულებისა და პრობაციის მინისტრს მოუწოდა, აღნიშნული პრობლემებით დაინტერესდეს.