ექსპრემიერ ზურაბ ჟვანიას ძმა გოგლა ჟვანია „კვირის პალიტრასთან“ აცხადებს, რომ ჟვანიას საქმეში აღმოჩენილ ახალ გარემოებას - ტყავის ჩანთას, ძირითად საქმესთან არანაირი კავშირი არ აქვს.

„ეს დეტალი არანაირად არ არის მნიშვნელოვანი, მას ჩაჩუას პროცესთან არანაირი კავშირი არ აქვს. ეს არის „ნაციონალების“ ჩვეული მეთოდი, როცა ერთ რაღაცას ეკითხები და სულ სხვა რაღაცაზე ცდილობენ ყურადღების გადატანას. რაღაც იდუმალებით მოცული ჩანთა გამოიტანეს წინა პლანზე, როცა მარტივ შეკითხვაზეა პასუხი გასაცემი: რატომ არ ჩაატარა ამ კაცმა ექსპერტიზა? ამ კითხვზე პასუხი არ არსებობს. ეს ჩანთა შეიძლება იყოს არსებული ან არარსებული ნივთმტკიცება, მაგრამ უფრო საინტერესო უნდა იყოს ძირითადი საქმე - ზურას საქმის გამოძიება, რომელიც დღეს დასრულებული არ არის.“, - აცხადებს გოგლა ჟვანია.

გარდაცვლილ რაულ უსუპოვის მამა, იაშარ უსუპოვის თქმით კი, რაულ უსუპოვს მკერდზე ნაჩხვლეტები ექსპერტიზის ჩატარებამდე ჰქონდა, სისხლის ლაქა პერანგზეც შეინიშნებოდა.

„რაულს მკერდზე ნაჩხვლეტები ექსპერტიზის ჩტარებამდე ჰქონდა, პერანგზეც იყო სისხლის ლაქა. ალბათ, ოდესმე დაადგენენ ამ ნაჩხვლეტების წარმომავლობას. ჩემს შვილს შხამი აქვს შეყვანილი ორგანიზმში, არანაირი ბალზამი. ჩაჩუა თავის მართლებასა და ყველას შეცდომაში შეყვანას შეეცდება“, - აცხადებს უსუპოვის მამა.