მუტანტების საიდუმლო, შემზარავი სოფელი რუსეთში – რატომ ჰყავთ გალიებში ადამიანები

ეს საინტერესოა - 12:20, 12 Jan, 2015

40659

ამერიკულ ჟურნალ ''უორლდ ობსერვერის'' 1991 წლის ერთ-ერთ ნომერში გამოქვეყნდა სენსაციური მასალა, რომელშიც რუსეთიდან ემიგრირებული, პროფესიით გეოლოგი ვინმე ანდრეი ლვოვი მართლაც დაუჯერებელ თავგადასავალს მოუყვა ჟურნალისტ პატრიკ მაკროუდს. საქმე ეხება რუსეთში არსებულ საიდუმლო ლაბორატორიას, სადაც თითქოს სრულიად უცნობი სახის სამუშაოები მიმდინარეობს.

რუსი გეოლოგი შემთხვევით წააწყდა მიყრუებულ ადგილზე ერთ-ერთ საიდუმლო დასახლებას, სადაც, მისივე თქმით, მუტანტები ცხოვრობდნენ. ამ დასახლებას სპეციალური სამსახურის ოფიცრები იცავდნენ. მეტიც, იგი ძლივს გადაურჩა სიკვდილს და შემდეგ მალევე გადასახლდა აშშ-ში.

გეოლოგი შემთხვევით შეხვედრილი ურჩხულის კვალს გაჰყვა, რომელიც სულ უფრო ღრმად შედიოდა ტყეში. დაახლოებით ორი საათის შემდეგ ლვოვი ვრცელ მინდორს მიუახლოვდა, რომელსაც რამდენიმე წყება მავთულხლართი ჰქონდა შემოვლებული. იქ საკმაოდ მკვიდრად ნაგები ათი ბარაკი იდგა. მათ სახურავები ზემოდან შესანიღბი ბადეებით იყო დაფარული, ისე, როგორც ამას სამხედროები აკეთებენ.

ბარაკიდან ერთმანეთის მიყოლებით, ''ურჩხულები'' გამოდიოდნენ, რიგში დგებოდნენ და განაპირას მდგარი შენობისკენ მიემართებოდნენ.
მონსტრები სხვადასხვა ფერის იყვნენ, ზოგი მათგანი კი საერთოდ აჭრელებული იყო. ბევრს თმის საფარი არ გააჩნდა, ზოგიერთს ცხვირი და ყურები ჰქონდა ატროფირებული და მათ ნაცვლად მხოლოდ ნახვრეტები მოუჩანდა. ყველაზე თვალში საცემი კი მაინც მათი არაბუნებრივი ფერი იყო. უფრო მეტიც, მან იქ პატარა ''ურჩხულებიც'' შენიშნა – შესაძლოა, ისინი მრავლდებოდნენ კიდეც.

უჩვეულო სანახაობის თვალიერებით გართული ლვოვი შენიშნეს და გამოეკიდნენ, მაგრამ მან მოახერხა დასხლტომოდა მდევრებს და ორი ურჩხული მოკლა კიდეც. ეს არსებები საოცარი სიცოცხლისუნარიანობით გამოირჩეოდნენ და თითოეულს ხუთი-ექვსი ტყვია მაინც დასჭირდა…
მოსკოვში დაბრუნებისთანავე ლვოვი ემიგრაციაში წავიდა.

მისმა მონათხრობმა აშშ-ში დიდი ინტერესი გამოიწვია. ჟურნალში გამოქვეყნებულ სტატიას ბიოლოგიის პროფესორი დევიდ ლევინგი გამოეხმაურა, რომელიც ასევე ერთ-ერთ საიდუმლო ბიოლოგიურ ლაბორატორიაში მუშაობდა:

-ჩემი აზრით, ლვოვი დასახლება-რეზერვაციას წააწყდა, სადაც რადიოაქტიური გამოსხივების მსხვერპლნი ჰყავთ გადამალული. ასეთი რეზერვაციები, ჩემი ღრმა რწმენით, აშშ-შიც უნდა არსებობდეს. მათ არსებობას გამართლებულად ვთვლი. ამ ადამიანთა მუტაციამ ისეთ მასშტაბებს მიაღწია, რომ ისინი უკვე სახიფათონი არიან გარშემო მყოფთათვის და მათი იზოლაციაც ყოველმხრივ გამართლებულია.
წყარო: etanews.ge