სომხეთში ჰეროინის გადაზიდვის ბარლდებით დაკავებული ავთანდილ მარტიაშვილის ოჯახი დახმარებას ითხოვს.

დაცვის მხარის ინფორმაციით, პროკურატურას მარტიაშვილის წინააღმდეგ არანაირი მტკიცებულება არ აქვს, რადგან სატვირთო ავტომობილის მძღოლმა მის მანქანაში ნარკოტიკის არსებობის შესახებ არაფერი იცოდა.

„სიმართლეს ნუ დაუკარგავენ ჩემს მეუღლეს. ჩაერიოს ქართული სახელმწიფო ამაში. თურქი, რომლის მანქანასაც მართავდა ამბობს, რომ ამან არაფერი არ იცოდაო. პროკურორი 18 წლიან პატიმრობას მოითხოვს. ეს იყო მძღოლი, იმან რა იცოდა რა გადაჰქონდა“, - ამბობს "რუსთავი 2"-თან საუბრისას მარტიაშვილის მეუღლე.

საქართველოს მოქალაქე სომხეთში უკვე ერთი წელია პატიმრობაში იმყოფება.

62 წლის მამაკაცი საზღვარზე ერთ ტონამდე ჰეროინის გადატანის ბრალდებით 2013 წლის იანვარში დააკავეს. ის თურქეთის მოქალაქის კუთვნილ სატვირთო ავტომობილს მართავდა. სასამართლო განაჩენს 20 იანვარს გამოაცხადებს.