ჟურნალ Charlie Hebdo-ს რედაქციაზე განხორციელებულ თავდასხმაზე პასუხისმგებლობას „ალ-ქაიდას“ იემენის დაჯგუფება იღებს.

ტერორისტული დაჯგუფების ლიდერის მიერ გავრცელებულ მიმართავში ნათქვამია, რომ ტერაქტის მიზანი მუჰამედის შეურაცხყოფაზე შურისძიება იყო.

მუსლიმთა წინასწარმეტყველის შეურაცხყოფაზე საუბრობს იემენის „ალ-ქაიდას“ კიდევ ერთი ლიდერი.

შეიხ ჰარეტ ნადარი პარიზში განხორციელებულ თავდასხმაზე პასუხისმგებლობას პირდაპირ არ იღებს, თუმცა აუდიო მიმართვაში ტერაქტის მიზეზებზე მიანიშნებს.

„საფრანგეთში რამდენიმე ადამიანმა ჩვენი წინასწარმეტყველის წინააღმდეგ აღმართა ხელი. ამიტომ ჩვენი ღმერთის ერთგულმა დამცველებმა მათ კარგი გაკვეთილი ჩაუტარეს. მათთან მივიდნენ ის სამხედროები, ვისაც ღმერთი უყვართ“, - ამბობს შეიხ ჰარეტ ნადარი.