ვაზისუბანში მოკლული 31 წლის მამაკაცის ცხედარი სამხარაულის ექსპერტიზის ბიუროდან სახლში გადაასვენეს. ოჯახის წევრების ინფორმაციით, მათ სამართალდამცველებმა დაუდასტურეს, რომ მკვლელობაში ბრალდებული პოლიციელია.

„ერთი თვის წინ მოხდა მსგავსი შემთხვევა. ზუსტად იგივე სადარბაზოში დახვდნენ ვიღაც ხულიგნები, მაშინ გარადჩა, თუმცა მთელი ათი დღე უგონოდ იყო. ძლივს გადავარჩინეთ. ეხლა იგივე განმეორდა. ვიღაც თავს დაესხა და მოკლეს ახალგაზრდა მამაკაცი. როგორც გავიგეთ,სამართალდამცველმა მოკლა, პოლიციაშიც ადასტურებდნენ ამას, მაგრამ ეხლა გვეუბნევიან, რომ ჯერჯერობით არ ვიცითო“, - ამბობს გარდაცვლილის მამა ზურაბ აღლუმაშვილი.

გარდაცვლილის ნათესავის ინფორმაციით, კობა აღლუმაშვილს ჭრილობა თავის არეში ბლაგვი საგნით აქვს მიყენებული.

„რაც ვნახე ნეტავ არ მენახა. თავის არეში აქვს ბლაგვი საგნით მიყენებული ჭრილობები, თავი ფაქტობრივად აღარ აქვს. როგორც პოლიციაში თქვეს ვირაც პატრულის თანამშრომელი აიყვანეს, რომელმაც აღიარა დანაშაულიო“, - აცხადებს მოკლულის ნათესავი ზურაბ მელაძე.

ვაზისუბანში 31 წლის მამაკაცი გუშინ საცხოვრებელი კორპუსისი სადარბაზოში მოკლეს. შსს-ს ინფორმაციით, მოხმდართან დაკავშირებით გამოძიება 108-ე, განზრახ მკვლელობის მუხლით მიმდინარეობს.