შინაგან საქმეთა მინისტრის ალექსანდრე ჭიკაიძის ბრძანებით ძალაში შევიდა ცვლილება "საქართველოს შინაგან საქმეთა სამინისტროს მოსამსახურეთა დისციპლინური წესდების დამტკიცების თაობაზე" შს მინისტრის 2013 წლის 31 დეკემბრის ბრძანებაში.

აღნიშნული ცვლილება შრომის დისციპლინის დარღვევების ნუსხას განსაზღვრავს.

დისციპლინის დარღვევას ითვლება სამსახურში ალკოჰოლური სასმელების მიღება ან ნასვამ მდგომარეობაში გამოცხადება, შრომის შინაგანაწესის დარღვევა, სახელმწიფო ქონების არასამსახურებრივი მიზნით გამოყენება, სამუშაო პერიოდში მოსამსახურის მიერ სამსახურში სამუშაო გარემოსთან შეუფერებელი ჩაცმულობით და იერსახით გამოცხადება, სხეულზე ტატუირების გაკეთება გამოსაჩენ ადგილას, სამსახურში დაგვიანება 15 წუთზე მეტი დროით, სამსახურში არასაპატიო მიზეზით ზედიზედ 5 დღეზე ნაკლები ვადით გაცდენა.

ასევე დარღვევად მიიჩნევა არასაპატიო მიზეზით სამუშაო შეხვედრაზე დაგვიანება, თამბაქოს მოწევა აკრძალულ ადგილზე, სამუშაო საათებში სამსახურებრივი მოვალეობის შესრულების დროს ძილი, სამსახურებრივი მოვალეობის შესრულებისას სამსახურებრივი პირადობის მოწმობის ან ჟეტონის არქონა, სამოქალაქო ტანსაცმელში ცეცხლსასროლი იარაღის გამოსაჩენად ტარება, შემთხვევის ადგილზე დაგვიანებით მისვლა ობიექტური მიზეზების გარდა; აუცილებლობის გარეშე ხმოვანი სიგნალისა (სირენა) და ხმამაღლამოლაპარაკე ხელსაწყოს (მეგაფონი) გამოყენება; სამსახურებრივი მოვალეობის შესრულების დროს საყოფაცხოვრებო ნარჩენებით გარემოსა და ზღვის დაბინძურება; შს სამინისტროს მოსამსახურის მიერ მასზე მიმაგრებული სამსახურებრივი ავტომანქანის სხვა პირისთვის სამართავად გადაცემა თუ ამავე ავტომანქანაში არ იმყოფება საქართველოს შინაგან საქმეთა სამინისტროს მოსამსახურე; სამსახურებრივი მოვალეობის შესრულების დროს "ბეიჯის" ტარების ვალდებულების დარღვევა იმ პირის მიერ, რომელსაც სამსახურებრივად ევალება მისი ტარება.

საპატრულო პოლიციას საპატრულო მანქანიდან მოქალაქესთან საუბარი, დადგენილი მარშრუტიდან თვითნებური გადახვევა, თუ ეს სამსახურებრივი აუცილებლობით არ არის გამოწვეული, საგზაო მოძრაობის მონაწილისადმი მიმართვა მხედრული სალმის გარეშე მარეგულირებლის მიერ და სამსახურებრივი მოვალეობის შესრულების დროს სამსახურებრივ ავტომანქანაში უცხო პირთა ჩასმა, გარდა სამსახურებრივი აუცილებლობისა.