თბილისში 2 იანვარს მომხდარ მკვლელობასთან დაკავშირებით ახალი დეტალები ხდება ცნობილი. ძმები ალექსანდრე და დენის ატარშიკოვები საკუთარ ბინაში სადისტურად მოკლეს. მათი ცხედრები დეიდამ და კომპანია"ჯეო ლიფტის" თანამშრომლებმა მეორე დღეს ბინაში აღმოაჩინეს. მეზობლების ინფორმაციით, შემთხვევის ღამეს 12-დან 2 საათამდე სახლიდან ხმაურის ხმა გამოდიოდაო. როგორც „ჯეო-ლიფტის“ თანამშრომელი „კვირის პალიტრასთან“ ინტერვიუში ყვება, მკვლელობა განსაკუთრებული სისასტიკით იყო ჩადენილი.

„ალბათ ნარკოტიკის ზემოქმედების ქვეშ ჩაიდინა დანაშაული. დენისი თურმე ქამრით მოახრჩვეს, მერე მისულა სახლში საშა და ისიც ხელით მოახრჩვეს, უკვე მკვდარი შეათრიეს საშა აბაზანაში. ბიჭებს სხვა დაზიანებებიც აქვთ. ორივე ძმა ერთად რომ ყოფილიყო სახლში მათ ვერ მოერეოდნენ. საშას თავშიც აქვს დაზიანება“, - ამბობს კომპანიის თანამშრომელი.

როგორც ცნობილია, ძმები ატარშიკოვები ბინაში მარტო ცხოვრობდნენ. ობლობაში გაზრდილებმა თურმე ცხოვრება თავიანთი შრომით აიწყვეს. დედა ადრე გარდაეცვალათ, მამა მოსკოვში ცხოვრობდა და პერიოდულად ჩამოდიოდა.

შინაგან საქმეთა სამინისტრომ დანაშაულში ბრალდებული სამი პირი დააკავა. გამოძიება დამამძიმებელ გარემოებებში ორი ან რამდენიმე პირის განზრახ მკვლელობის ფაქტზე მიმდინარეობს.

წყარო: კვირის პალიტრა