პარიზში, ჟურნალ "შარლი ებდოს" რედაქციაზე თავდასხმის შედეგად დაღუპულთა შორის გამოცემის მთავარი რედაქტორი და სამი ცნობილი კარიკატურისტი არიან.

ამის შესახებ ინფორმაციას "ბი-ბი-სი" ავრცელებს.

თვითმხილველების ინფორმაციით თავდასხმაში რამდენიმე ადამიანი მონაწილეობდა, რომლებიც კალაშნიკოვის ტიპის იარაღით იყვენ შეიარაღებულნი და ჯიჰადისტებისთვიც ჩვეულ სამოსში გამოწყობილნი, ხოლო სახეზე ნიღბები ეკეთათ. ისინი ყვიროდნენ "დიდება ალაჰს" და "ჩვენ შური ვიძიეთ წინასწარმეტყველის გამო!".

თავდამსხმელებმა ტერიტორია შავი ფერის ავტომობილით დატოვეს, რომელიც მოგვიანებით პარიზის ერთ-ერთ გარეუბანში მიტოვებული ნახეს.

საფრანგეთის დედაქალაქში გაძლიერებულია უსაფრთხოების ზომები, მათ შორის სადგურებზე, მასობრივი ინფორმაციის საშუალებების რედაქციებთან და რელიგიურ ობიექტებთან.

შემთხვევის ადგილზე მივიდა საფრანგეთის პრეზიდენტი ფრანსუა ოლანდი, რომელმაც პირობა დადო, რომ გააკეთებს ყველაფერს რათა იპოვონ და დასაჯონ დამნაშავეები, რომლებმაც „ განახორციელეს თავდასხმა საფრანგეთის რესპუბლიკის პრინციპებზე“

ოლანდმა მომხდარს „საფრანგეთის წინააღმდეგ მიმართული ტერორისტული აქტი“ უწოდა.

საფრანგეთის ლიდერის განცხადებით უახლოეს მომავალში ტრაგიკულ ინციდენტთან დაკავშირებით მინისტრთა კაბინეტის საგანგებო სხდომა ჩატარდება.

პარიზში მომხდარ თავდასხმას გამოეხმაურა დიდი ბრიტანეთის პრემიერ მინისტრიც, დევიდ კემერონმა საფრანგეთს ტერორიზმთან ბრძოლაში და მედიის თავისუფლების დაცვაში დახმარება აღუთქვა.