ადეიშვილი ნაპოვნია - მისი ოჯახი პოლიციას ძლადობასა და დევნაში ადანაშაულებს

სამართალი - 23:47, 06 Jan, 2015

4094

სამტრედიაში დაკარგული 19 წლის გიორგი ადეიშვილი სახლში დაბრუნდა. შინაგან საქმეთა სამინისტროს ინფორმაციით, ადეიშვილი სახლში მას შემდეგ მივიდა, რაც შსს-ს წარმომადგენლები დაკარგული ახალგაზრდის ოჯახში მივიდნენ და მასზე ძებნა გამოაცხადეს. ადეიშვილის გაუჩინარების შესახებ ოჯახმა განცხადება დღეს გააკეთა. შსს-ს ინფორმაციით, პოლიციას ადეიშვილი არ დაუკავებია.

"პოლიციას ეს პირი არ დაუკავებია. სამართალდამცველებმა ნარკოლოგიურ შემოწმებაზე მხოლოდ მისი მეგობარი გადაიყვანეს", - აცხადებენ შსს-ში.

რაც შეეხება ადეიშვილის დედის განცხადებას, რომ შვილის ძებნაში პოლიციამ დახმარებაზე უარი უთხრა, შსს-ში განმარტავენ, რომ ოჯახს სამართალდამცველებისთვის ამ თხოვნით არ მიუმართავს.

ადეიშვილის დედის ინფორმაციით კი გუშინ საპატრულო პოლიციამ ქუჩაში მისი შვილის დაპატიმრება სცადა, თუმცა ბიჭმა მათგან თავის დაღწევა მოახერხა, და გაიქცა.

„ისეა შეშინებული, ვერაფერს ვერ ამბობს. ნაცემია, თვალი აქვს დალურჯებული. პოლიციამ მიაყენა ეს ტრამვა, ამის მოწმეებიც არიან. დაჭერის დროს ოთხი-ხუთი კაცი მივარდა, დაუგრიხეს ხელები და მანქანაში ჩასვეს. როგორც ბავშვმა თქვა, ამის შემდეგ გზაზე პიკაპი გადაუდგათ, იარაღი ჰქონიათ და ჩემი შვილი ამ დროს შეშინებული სადღაც გაქცეულა“, - ამბობს ადეიშვილის დედა.