ტყავის ჩანთა და პარიკი - რა კავშირშია ეს ნივთები ზურაბ ჟვანიას გარდაცვალებასთან

სამართალი - 14:19, 06 Jan, 2015

10230

საქალაქო სასამართლოში ზურაბ ჟვანიას გარდაცვალების საქმეზე დაკავებულ ლევან ჩაჩუას პროცესზე მოწმის დაკითხვისას ახალი დეტალის - კერძოდ ჩანთის შესახებ წარიმართა საუბარი.

დაცვის მხარე ერთ-ერთი მოწმის, გამომძიებელ კახა ჭუმბაძის დაკითხვისას დაინტერესდა, ნახა თუ არა შემთხვევის ადგილზე ტყავის ჩანთა.

კახა ჭუმბაძე ზურაბ ჟვანიას გარდაცვალების საქმეზე იმ პერიოდში საგამოძიებო ჯგუფს ხელმძღვანელობდა. მან შემთხვევის ადგილზე ჩანთის არსებობა დაადასტურა, ადვოკატის კიტხვაზე იყო თუ არა ჩანთა დათვალიერებული და ნახა თუ არა ჩანთაში პარიკი, მოწმემ უპასუხა, რომ ჩანთა ნანახი ჰქონდა მაგრამ არ ახსოვს რა იდო ჩანთაში. ამ დეტალზე განმარტებას დაცვის მხარე ამ ეტაპზე არ აკეთებს.

ადვოკატ ზურაბ ტაბიძის განცხადებით, აღნიშნული ჩანთის მნიშვნელობას დაცვის მხარე საკუთარ დასკვნით სიტყვაში განმარტავს.
ლევან ჩაჩუამან ამ საკითხზე საუბარი დახურულ სხდომაზე მოითხოვა, თუმცა მოსამართლემ მისი მოთხოვნა არ დააკმაყოფილა.
ჩანთასთან დაკავშირებით კომენტარის გაკეთება არც საქმის პროკურორმა ისურვა. რევაზ ნადოის თქმით აღნიშნული ჩანთა ამ საქმეს არ ეხება და შესაბამისად იგი ვერანაირ კომენტარს ვერ გააკეთებს.
ლევან ჩაჩუას სასამართლო პროცესი 9 იანვარს 11.00 საათზე განახლდება. როგორც ცნიბილია, შემდეგი პროცესი კვლავ ბრალდების მხარის მტკიცებულებების გამოკვლევის ეტაპით გაგრძელდება.