ლატვია ევროკავშირის თავმჯდომარე ქვეყანა გახდა

მსოფლიო - 20:48, 01 Jan, 2015

4812

1 იანვრიდან ევროკავშირის უმაღლესი ორგანოს თავმჯდომარის პოსტი როტაციის წესით იტალიისაგან ლატვიამ გადაიბარა. „ლატვია ევროპულ საბჭოს პირველად უხელმძღვანელებს, ამიტომ ჩვენ საქმეს განსაკუთრებული პასუხისმგებლობით ვუდგებით. ჩვენი პრიორიტეტი სამუშაო ადგილების შექმნა, ეკონომიკური ზრდა, ევროკავშირის კონკურენტუნარიანობის გაზრდა და ერთიანი ევროპული ბაზრის განვითარებაა“ - განაცხადა ლატვიის პრემიერმინისტრმა ლაიმდოტა სტრაუიუმამ.

ევროკავშირის თავმჯდომარეობის პერიოდში ლატვიამ თავის ძირითად პრიორიტეტთა შორის აღმოსავლეთ ევროპის პარტნიორობის პროგრამის ფარგლებში პოსტსაბჭოთა ქვეყნებთან ურთიერთობის განვითარება დაასახელა. ამასთან სტრაუიუმამ აღნიშნა, რომ ამ შემთხვევაში რიგა ინდივიდუალური მიდგომის მომხრეა.

„ჩვენ უნდა ვაწარმოოთ სერიოზული თანამშრომლობა, რომელიც მოიცავს პოლიტიკურ დილოგს, კანონის უზენაესობას და რიგ სხვა საკითხებს“ - აღნიშნა ლატვიის საგარეო საქმეთა მინისტრმა ედგარ რინკევიჩმა.

„ლატვიამ სწორად გაანაწილა პრიორიტეტები და შეუძლია გერმანიის სრული მხარდაჭერის იმედი ჰქონდეს“ - განაცხადა გერმანიის საგარეო საქმეთა მინისტრმა ფრანკ-ვალტერ შტაინმაიერმა.