ასტროლოგი მიხეილ ცაგარელი მოსახლეობას რჩევებს აძლევს, თუ როგორ უნდა შეხვდნენ დამდეგ 2015 წელს.

მისი თქმით, მნიშვნელოვანია საახალწლო სუფრაზე რაც შეიძლება მეტი ხის ნაწარმი იყოს. მაგალითად, ხის კოვზები, ხისგან დამზადებული ჭურჭელი და ნაკეთობები.

„მაგიდა, სადაც ახალ წელს შეხვდებით, აუცილებლად ხისგან უნდა იყოს დამზადებული. კარგი იქნება, თუ ახალ წელს ჩიჩილაკთან შევხვდებით. ნატურალური ნაძვის ხე კიდევ უკეთესია. მნიშვნელოვანია მანდარინის ხე ან ტოტი. ჩინელების ნაძვის ხე სწორედ მანდარინის ხეა. ნალი ისევ აქტუალურია და კარგი იქნება, 31 დეკემბერს ნალის სიმბოლიკა გვქონდეს. მაგიდაზე უნდა დავდოთ ცხენის და თხის სიმბოლიკა. რაც მეტი ბავშვები გვეყოლება 31-ში, მით უკეთესი. ახალ წელს ძალიან ნუ ვიხმაურებთ სროლებით. ხმაურის მიმართ ცხენი კი უპრობლემოა, მაგრამ თხას ხმაური არ უყვარს და გაურბის“, - განაცხადა ცაგარელმა.

მისი თქმით, კარგი იქნება თუ სუფრაზე გოგრას გამოვიყენებთ. როგორც ცაგარელი ამბობს, გოგრა უნდა გავჭრათ, შიდა ნაწილები ამოვაცალოთ და სამზარეულოს იატაკზე დავყაროთ

ასტროლოგის განმარტებით, ეს ბარაქის და ფინანსური შემოსავლის სიმბოლოდ ითვლება.

„სანთელთან მუშაობაც მნიშვნელოვანია. ახალი წლის დადგომამდე 15 წუთით ადრე სამი სანთელი ინთება. გნებავთ მწვანე ფერის, გნებავთ ლურჯის და გნებავთ თეთრის. ამ დროს პირველ რიგში პატივს მიაგებ გასულ წელს. მადლობა გადაუხადეთ სამყაროს, რომ ეს წელიწადი მაინც მოგცათ და თუ გასული წლისგან რაიმე ცუდი დაგრჩათ სანთლის ალს გააყოლეთ. ახალი წლის დადგომამდე 5 წუთით ადრე იგივე სანთელს სთხოვეთ, რა გინდათ რომ 2015 წელს აგისრულდეთ“, - განაცხადა ცაგარელმა.