შინაგან საქმეთა სამინისტრო თანამშრომელთა სამედიცინო დაზღვევის ტენდერის ჩაშლასთან დაკავშირებით გავრცელებულ ინფორმაციას არასწორს უწოდებს.

ამის შესახებ შინაგან საქმეთა სამინისტროს მიერ გავრცელებულ განცხადებაშია ნათქვამი.

"კოალიცია „საზოგადოებრივმა ინიციატივამ“ მედიის საშუალებით გაავრცელა ცნობა, თითქოს შინაგან საქმეთასამინისტროს თანამშრომელები სამედიცინო დაზღვევის გარეშე რჩებიან.

გვსურს ვუპასუხოთ აღნიშნულ განცხადებას, რომელიც მხოლოდ საზოგადოების შეცდომაში შეყვანის მიზანს ემსახურება. შინაგან საქმეთა სამინისტროს უკლებლივ ყველა თანამშრომელს 2015 წელს შეუნარჩუნდება სამედიცინო დაზღვევის იგივე პირობები, რომელიც ჰქონდათ 2013-2014 წლებში. ასევე, თანამშრომელთა ოჯახებს საშუალება ექნებათ ისარგებლონ მოქნილი და საიმედო სადაზღვევო პაკეტებით.

შინაგან საქმეთა სამინისტრომ თანამშრომლების სამედიცინო დაზღვევით უზრუნველსაყოფად დაიცვა კანონმდებლობის ყველა მოთხოვნა: ჩაატარა ბაზრის კვლევა, გამოაცხადა ორი ტენდერი და კონკურენტულ პირობებში შეარჩია მზღვეველი კომპანიები. მომსახურების შესყიდვა ყველაზე ოპტიმალური სადაზღვევო პაკეტების მიხედვით, 2015 წლიდან მოხდება სადაზღვევო ბაზარზე არსებული ყველაზე დაბალი ფასებით.

მოვუწოდებთ ორგანიზაცია „საზოგადოებრივ ინიციატივას“ თავი შეიკავოს განცხადებების გაკეთებისგან იმ საკითხებზე, რომელშიც არავითარი გამოცდილება არ აქვს და საკუთარი ცნობების სიზუსტე ამ საკითხზე არც კი გადაუმოწმებია. ასევე, ვთავაზობთ შსს თანამშრომლების სადაზღვევო პაკეტზე თავად ჩაატაროს ბაზრის შესწავლა და მოგვაწოდოს პაკეტის ღირებულების საკუთარი შედეგები იმ პირობით, რომ თუ ის ამჟამად მიღებულ ფასზე მაღალი იქნება - ორგანიზაცია „საზოგადოებრივი ინიციატივა“ საჯაროდ მოუხდის ბოდიშს შინაგან საქმეთა სამინისტროს", - ნათქვამია განცხადებაში.

კოალიცია "საზოგადოებრივი ინიციატივის" ინფომაციით, შინაგან საქმეთა სამინისტროში თანამშრომელთა სამედიცინო დაზღვევის ტენდერი ჩაიშალა და 27 000 თანამშრომელი და მათი ოჯახები დაზღვევის გარეშე დარჩნენ.