2014 წელს ოჯახური ძალადობის ნიადაგზე ჩადენილი 19 მკვლელობის შემთხვევა ფიქსირდება. ინფორმაციას IDFI ავრცელებს. ორგანიზაციამ ინფორმაცია მთავარი პროკურატურისგან გამოითხოვა.

„2009-2014 წლებში ოჯახური ძალადობის ნიადაგზე ჩადენილ მკვლელობათა ფაქტებზე სისხლის სამართლებრივი დევნის დაწყების 45 შემთხვევა ფიქსირდება. საქართველოს პროკურატურიდან მიღებული მონაცემების მიხედვით 2009-2014 წლებში ოჯახური ძალადობის ნიადაგზე ჩადენილი მკვლელობების 45 შემთხვევიდან 16 შემთხვევა ფიქსირდება თბილისში, ხოლო დანარჩენი 29 შემთხვევა რეგიონებში.

აღსანიშნავია ის ფაქტი, რომ საქართველოს პროკურატურის მიერ მოწოდებული მონაცემების მიხედვით ზოგადად მკვლელობებზე დაწყებული სისხლის სამართლებრივი დევნის 2014 წლის 11 თვის მაჩვენებლები არ არის გამორჩეული განვლილ წლებთან შედარებით, თუმცა მნიშვნელოვნად გაზრდილია მასში ოჯახური ძალადობის ნიადაგზე ჩადენილი მკვლელობების პროცენტული წილი.

IDFI-ის მიერ ოჯახური ძალადობის ნიადაგზე ჩადენილი მკვლელობების შესახებ სტატისტიკური ინფორმაცია მოთხოვნილი იქნა აგრეთვე უშუალოდ მეუღლეთა შორის დაფიქსირებული შემთხვევების და მსხვერპლის სქესის დაკონკრეტებით, თუმცა, როგორც პროკურატურამ განმარტა აღნიშნული ხასიათის სტატისტიკური ინფორმაციის წარმოება მათ მიერ არ ხორციელდება.

დეტალურად საქართველოს პროკურატურიდან მიღებული მონაცემები 2009-2014 წლებში მკვლელობების შემთხვევებზე, მათ შორის ოჯახური ძალადობით, სისხლის სამართლებრივი დევნის დაწყების შესახებ შეგიძლიათ იხილოთ ქვემოთ წარმოდგენილ დოკუმენტაციაში“, - ნათქვამია ორგანიზაციის მიერ გავრცელებულ ინფორმაციაში.