მთავარი პროკურორის გიორგი ბადაშვილის თქმით, წინა ხელისუფლების დროს ქონების უკანონოდ ჩამორთმევის საქმეების შესწავლა მყისიერად ვერ მოხდება.

ამის შესახებ ბადაშვილმა გაზეთ „კვირის პალიტრასთან“ ინტერვიუში განაცხადა.

მისი თქმით, საქმეების შესწავლას გარკვეული დრო დასჭირდება.

„2015 წლის დამდეგიდან საქართველოს პროკურატურაში იგეგმება სპეციალური სამმართველოს შექმნა, რომელიც სპეციალიზებული იქნება უშუალოდ ამ საკითხებზე სამუშაოდ, რათა ერთხელ და სამუდამოდ აღიკვეთოს ქვეყანაში ის უსამართლობის განცდა, რაც მემკვიდრეობით გვერგო. ქონების უკანონოდ ჩამორთმევის საქმეების გამოძიებას დასჭირდება გარკვეული პერიოდი, ეს ვერ მოხდება მყისიერად, რადგანაც წლების განმავლობაში ათასობით ფაქტი დაგროვდა. თითოეული მათგანი საჭიროებს ინდივიდუალურად დეტალურ შესწავლას. საქართველოს პროკურატურა ამ პრობლემის გადაჭრის გზებსა და გეგმებზე საზოგადოებას უახლოეს მომავალში სრულ და დეტალურ ინფორმაციას მიაწვდის“, - განაცხადა ბადაშვილმა.

შეგახსენებთ, 26 დეკემბერს, 2014 წლის მთავრობის საქმიოანობის შემაჯამაბელ პრეკონფერენციაზე, საქართველოს პრემიერ მინისტრმა ჟურნალისტებთან განაცხადა, რომ თებერვალში მთავრობა საზოგადოებას წარუდგენს გეგმას, თუ როგორ მოხდება იმ საჩივრებზე რეაგირება რომელიც პროკურატურაში არის შესული და რომელიც ჩამორთმეული ქონების დაბრუნებას და წინა მთავრობის პერიოდში დაპატიმრებული ადამიანების რეაბილიტაციას ეხება.