სრულიად საქართველოს კათალიკოს-პატრიარქის, უწმინდესისა და უნეტარესი ილია მეორის განცხადებით, იმ ხნის განმავლობაში, რაც საქართველოს ეკლესიის საჭეთმპყრობელია, სასოწარკვეთა არასდროს დაუფლებია.

ამის შესახებ პატრიარქმა სვეტიცხოვლის ტაძარში, საზეიმო წირვის დასრულების შემდეგ ქადაგებისას განაცხადა, სადაც პატრიარქობისას განვლილ ცხოვრებაზე ისაუბრა. როგორც ილია მეორემ აღნიშნა, ამ ხნის განმავლობაში, ის ყოველთვის ხედავს საქართველოს გაჭირვებას, თუმცა, იმედი არასდროს დაუკარგავს.

„მე ვხედავდი იმ გაჭირვებას, რომელშიც იყო საქართველო და ჩვენი ეკლესია. ამავე დროს, მე ვხედავდი, რომ ძალიან ახლოს ვიყავი ღმერთთან და ღმერთი ახლოს იყო ჩვენთან, ამიტომ ამ 37 წლის განმავლობაში არასდროს სასოწარკვეთა არ ყოფილა ჩემში. ვხედავდი ღვთის წყალობას, იმ მადლს, რომელიც მოეფინა და ეფინება საქართველოს“, - განაცხადა ილია მეორემ.

მეუფე დავითის შემდეგ უწმინდესს საქართველოს პრემიერ-მინისტრმა, ირაკლი ღარიბაშვილმა ამბიონიდან მიმართა და აღსაყდრების 37-ე წელი მიულოცა. პრემიერმა აღნიშნა, რომ ქართველმა ხალხმა ამ 37 წლის განმავლობაში ურთულესი განსაცდელები გამოიარა. მისივე თქმით, პატრიარქი ერისათვის იმედთან ასოცირდება, ერისთვის კაცთმოყვარეობის, მიმტევებლობის, მამულიშვილური სიყვარულის მაგალითია.

პატრიარქის აღსაყდრებიდან დღეს 37 წელი შესრულდა. ამასთან, დაკავშირებით საზეიმო ღვთისმსახურება სვეტიცხოვლის საკათედრო ტაძარში აღევლინა.