რუსეთსა და ოკუპირებული ცხინვალის რეგიონს შორის ე.წ შეთანხმების პროექტის მიხედვით რუსეთისა და სამხრეთ ოსეთის სახელმწიფო ინსტიტუტების სრული ინტეგრაცია იგეგმება, ოკუპირებული რეგიონთან მიმართებაში თავდაცვისა და უსაფრთხოების ფუნქციას მოსკოვი თავის თავზე იღებს. ერთიანდება რუსეთისა და ცხინვალის საოკუპაციო რეჟიმის არმია და ძალოვანი სტუქტურები, მათ შორის სპეცსამსახურები.

აღნიშნულ საკითხთან დაკავშირებით „ნიუპოსტი“ "ჯიპას" პროფესორს, საერთაშორისო ურთიერთობათა სპეციალისტს, თორნიკე შარაშენიძეს ესაუბრა:

ექსპერტის აზრით, რუსეთსა და ოკუპირებულ ცხინვალს შორის გასაფორმებელ ე.წ სამოკავშირეო შეთანხმებასთან დაკავშირებით სამი მომენტი უნდა გამოიყოს:

„პირველი ეს არის ეტაპობრივად ანექსიის გაგრძელება და ეს განხორციელდა კიდევ უფრო თავხედურად, ვიდრე აფხაზეთის შემთხვევაში, სადაც ადგილობრივმა ხელისუფლებამ გარკვეული წინააღმდეგობა გაუწია.

მეორე - სრული უნაყოფობა საქართველოს საგარეო პოლიტიკის , რამაც საბოლოოდ ეს შედეგი გამოიღო.

მესამე მომენტი არის ის, რომ ეს შეთანხმება ძალიან დიდ საფრთხეს ქმნის, რადგანაც რუსეთს სამხრეთ ოსეთის ძალოვანების სახელით შეეძლებათ სპეცოპერაციების ჩაატარება, საქართველოს წინააღმდეგ პროვოკაციების მოწყობა.“- აღნიშნავს შარაშენიძე.

ე.წ შეთანხმების პროექტი რუსეთსა და ცხინვალს შორის გამშვები და საბაჟო პუნქტების გაუქმებასაც ითვალისწინებს, ექსპერტის აზრით იმისდა მიუხედავად , რომ რუსეთი მსოფლიო სავაჭრო ორგანიზაციის წევრია, ის არც ამ ორგანიზაციის წესებს უყურებს სერიოზულად:

„საბაჟო პუნქტების გაუქმებასთან დაკავშირებით საქართველოს შეუძლია უჩივლოს მსოფლიო სავაჭრო ორგანიზაციაში, თუმცა არსებული სიტუაციის გათვალისწინებით, რუსეთი არც მსოფლიო სავაჭრო ორგანიზაციის წესებს უყურებს სერიოზულად.“- აცხადებს შარაშენიძე.

შეგახსენებთ, მოკავშირეობისა და ინტეგრაციის შესახებ ახალი შეთანხმების გაფორმება მოსკოვსა და ცხინვალს შორის 2015 წლის დასაწყისში იგეგმება.