როგორ ,,გაქრა“ ზუგდიდის ფოსტიდან მამაოს ოქროს ჯვარი და ბავშვის ფეხსაცმელები

სამართალი - 18:23, 20 Dec, 2014

4971

საქართველოს ფოსტის ზუგდიდის ფილიალში ერთ თვეში ოქროს დაკარგვის მეორე ფაქტი მოხდა. დღეს გაირკვა, რომ ზუგდიდის ვლაქერნის ღვთიმშობლის ტაძირის მღვდელმსახურს მამა დიმიტრი ვეკუას ამანათიდან 17 გრამი ოქრო და ბავშვის ფეხსაცმელები არის ამოღებული. ,,ნიუპოსტის" კორესპონდენტის ცნობით, ოქროს ყელსაბამი და ჯვარი ნათლობისთვის ერთ-ერთმა ნათლიამ საბერძნეთიდან მამაოს სახელზე გამოგზავნა.

კიდევ ერთი ფაქტი, რომელიც მანამდე იყო ცნობილი, სოფიო ქირიას ამანათიდან დაიკარგა 10 ათასი დოლარის ოქრო, რომელიც მისმა ნათესავმა თეა ჯიჭონაიამ ასევე საბერძნეთიდან გამოუგზავნა. როგორც ზუგდიდის ფოსტაში აცხადებენ, გზავნილმა განბაჟება გაიარა და ამის შესაბამისი საბუთებიც თავად ამანათში დევს. ამას ადასტურებენ ქუთაისის ფოსტაშიც, არსებობს ეჭვი, რომ ამანათში არსებული ნივთები ქუთაისსა და ზუგდის შორის დაიკარგა, მამაოს განმარტებით, მან როგორც კი შეამჩნია, რომ ამანათი საეჭვოდ იყო ე.წ. სკოჩით გადაკრული, ფოსტის თანამშრომლებს მოსთხოვა, გზავნილი მათი თანდასწრებით გახსნილიყო, რის შემდეგაც აღმოჩნდა, რომ 17 გრამი ოქრო და ბავშვის ფეხსაცმელები დაკარგული იყო.

მომხდარი დაადასტურა ზუგდიდის პოლიციის საგამოძიებო ნაწილის უფროსმა გიგა კორსანტიამ.