საქართველოს მთავარი პროკურატურის დეპარტამენტის უფროსის კახა წერეთლის განმარტებით, იმ 25 პირიდან, რომლიც მიჩნეულია პოლიტდევნილად, 9 იძებნებოდა ინტერპოლის მიერ, პარლამენტის მიერ გამოხატული ნების საფუძველზე პროკურატურამ მიმართა ინტერპოლს და დღეს მათ მიმართ ძებნა გაუქმდა.

,,ამ პირების მიმართ ჯერ პროცედურები დასასრულებელია. ველოდებით სასამართლოს გადაწყვეტილებებს, რომელთა საფუძველზეც დსთ-ის მასშტაბითაც და ქვეყნის შიგნითაც მათზე ძებნა მოიხსნება’’, -  კახა წერეთელმა.

მთავარი პროკურატურა პოლიტდევნილის სტატუსის მქონე პირებს დსთ-ის ქვეყნების გავლით სამშობლოში დაბრუნებისგან ერთი კვირის განმავლობაში თავშეკავებას ურჩევს, რადგან ამ ორგანიზაციის წევრ სახელმწიფოებში სხვა ტიპის ხელშეკრულებები მოქმედებს და საჭირო პროცედურების გავლას დრო სჭირდება.

შეგახსენებთ, რომ ინტერპოლის მიერ ძებნილები აღარ არიან მიხეილ ქარელი, ბიძინა გიორგობიანი, ჯემალ ქარქუსოვი, გიორგი ქადაგიშვილი, იასონ ჩიხლაძე, ლევან ფხაკაძე, გურამ გოგუა, მელიქ რაისიანი და ილია რამიშვილი.