ოკუპირებულ აფხაზეთის იზოლატორში თვეზე მეტია ოთხი ქართველი ახალგაზრდა ჰყავთ დატყვევებული.

სოფელ კახათიდან გიგა და ზაზა კეზოები, ასევე სოფელ კოკიდან დათო ჩუხუა აფხაზეთის ტერიტორიაზე სამუშაოდ გადადიოდნენ. რუსმა ოკუპანტებმა ისინი ადმინისტრაციულ სასაზღვრო ზოლზე დააკავეს და მათ გამოსასყიდად 10 ათას ლარს ითხოვენ.

კეზოები საზღვრის უკანონო გადაკვეთის გამო დააკავეს და ოჯახს სწორედ ამ მოტივით შემოუთვალეს ფული. შემდეგ დაატყვევეს და სანამ ფულს არ გადაიხდიან, მათ იზოლატორიდან არ ათავისუფლებენ.

როგორც ცნობილია, 25 წლის გიგა და 21 წლის ზაზა კეზოები სამშენებლო კომპანიაში სამუშაოდ გადადიოდნენ. ერთ-ერთ კომპანიას ისინი საზღვარზე არალეგალურად გადაჰყავდა და სწორედ ამ დროს მოხდა მათი დაკავება.