სოფლის მეურნეობის სამინისტროს სსიპ სურსათის ეროვნული სააგენტოს სამცხე-ჯავახეთის, მცხეთა-მთიანეთისა და შიდა ქართლის რეგიონულმა სამმართველოებმა რამდენიმე ბიზნესოპერატორს საწარმოო პროცესი შეუჩერეს.

ინსპექტირება ჩატარდა მცხეთაში, ი/მ "გია მამულაშვილის" ხორცის სარეალიზაციო ობიექტში, ახალციხის რაიონის სოფელ სხვილისში - ი/მ "მარიამ პოზოიანის" საცხობსა და გორში, ხორცის გაყინული ნახევარფაბრიკატების საწარმოში (შპს "გაამოთ").

გამოვლინდა კრიტიკული შეუსაბამობები - ანტისანიტარია, საგნებისა და აღჭურვილობების არასათანადო დასუფთავება-დეზინფიცირება, კონდენსატის დაგროვება მაცივარში. გარდა ამისა, შპს-დან "გაამოთ" ამოღებული და დალუქულია 305 კგ სუბპროდუქტი ჯანმრთელობის ნიშანდების - ფორმა #2-ის გარეშე.

აღნიშნულ ბიზნესოპერატორებს კრიტიკული შეუსაბამობების აღმოფხვრამდე შეუჩერდათ საწარმოო პროცესი და 1000-1000 ლარით დაჯარიმდნენ.