უკრაინის ჯანდაცვის სამინისტრო სადაზღვევო სისტემის ეფექტურად ამოქმედებისთვის საავადმყოფოების ქსელის რეორგანიზაციას იწყებს, უკრაინული მედიის ცნობით ამის შესახებ უკრაინის ჯანდაცვის მინიტრმა ალექსანდრე კვიტაშვილმა განაცხადა.

„იმისთვის რომ არსებული საავადმყოფოების ქსელი ქვეყანაში არსებულ მოთხოვნებს აკმაყოფილებდეს, ჩვენ ვიწყებთ რეორგანიზაციას, რათა ის შესაბამისობაში მოვიდეს ხარისხთან, გეოგრაფიათან, ადგილმდებარეობათან. ამჟამად დაფინანსება ჯერ კიდევ საწოლი ადგილების მიხედვით ხორციელდება, ამ სისტემაში კი არც ერთ სადაზღვევო კომპანიას არ მოისურვებს ჩართვას“- განაცხადა კვიტაშვილმა.

„თავდაპირველად უნდა მოხდეს ქსელის რეფორმირება, შემდეგ კი საგადასახადო სისტემის, რათა დამსაქმებლებმა შეძლონ თანამშრომლებს სადაზღვევო პოლისები შეუძინონ“- აღნიშნა უკრაინის ჯანდაცვის მინისტრმა.

ამასთანავე კვიტაშვილმა განაცხადა, რომ ის მომხრეა შენარჩუნდეს მიზნობრივი სახელმწიფო პროგრამები, მინისტრის თქმით მიზნობრივი დახმარება უნდა გაეწიოს მათ ვისაც ეს სჭირდება , მძიმე ავადმყოფებს და სოციალურად დაუცველებს.

ამ კვირაში, მთავრობის სამოქმედო პროგრამის წარდგენის დროს პრემიერმა არსენ იაცენუკმა განაცხადა, რომ უკრაინაში სამედიცინო დაზღვევა დაინერგება, თუმცა უკრაინის მთავრობის მეთაურს პროექტის განხორციელების გეგმები არ დაუკონკრეტებია.