მთავარი პროკურორის არჩილ კბილაშვილის განცხადებით, გუშინ ფირების განსაჯაროებით არც კანონი დაურღვევია და არც ადამიანის უფლებების დარღვევა არ მომხდარა, რადგან მასზე ვინმეს ამოცნობა შეუძლებელი იყო.


"გუშინ გამოქვეყნებულ ჩანაწერებთან დაკავშირებით შემიძლია, ვთქვა, რომ ადამიანის უფლებები დარღვეული იქნებოდა იმ შემთხვევაში, თუ შესაძლებელი გახდებოდა ვინმეს ამოცნობა, ამდენად ადამიანის უფლებების დარღვევა არ მომხდარა. რაც შეეხება ჩანაწერების გამოქვეყნების მიზანს, არავინ დაობს, რომ ნებისიმერ ხელისუფლებას კონკრეტული მიზანი და საქმიანობის სტილი აქვს, თუმცა არ შეიძლება, მიზნის მისაღწევად გამოყენებული იყოს ისეთი საქმიანობა, რომელიც ზნეობრიობასთან შეუთავსებელია. მასალები ადასტურებს, რომ პოლიტიკური ლოიალობის მიღწევის მიზნით კონციდენტები ურთიერთობაში შედიოდნენ სექსუალურ უმცირესობას მიკუთვნებულ მამაკაცებთან, რომელიც საზოგადოებისთვის ცნობილი სახეები იყვნენ და შემდეგ ამით აღწევდნენ იმას, რომ ეს საზოგადოებისთვის ცნობილი სახეები რეჟიმის მიმართ ლოიალურ დამოკიდებულებას ამჟღავნებდნენ", - განაცხადა კბილაშვილმა და დასძინა, რომ ამ გადასახედიდან იგი არ თვლის, რომ სხვა მსგავსი ვიდეო-მასალის გამოქვეყნება იყოს საჭირო. ამის გამოქვეყნებით ჩვენ გამოვამჟღავნეთ დანაშული, რომელსაც ოპერატიული სამსახურის თანამშრომლები და მაღალი თანამდებობის პირები ჩადიოდნენ", - განაცხადა კბილაშვილმა.

კბილაშვილს აინტერესებს, რას ელოდა საზოგადოება მისგან, დამალვას თუ მხილებას. "თუ ეს ამ სახელწიფოს ავადმყოფობა იყო, მაშინ რა ვქნათ, დავმალოთ?.
მაშინ არ უნდა ყოფილიყო ნაჩვენები არც ცოცხები, არც ცემა-ტყეპის ამსახველი სხვა ვიდეო-მასალა. ბუნებრივია, მსგავსი კადრების ხილვა უარყოფით განწყობას იწვევს, მაგრამ რა ვქნათ, უნდა დავმალოთ?!" - განაცხადა კბილაშვილმა.