ასოციაცია ,,ლგბტ საქართველო" პროკურატურის ქმედებას გმობს და განცხადებას ავრცელებს

საზოგადოება - 12:47, 15 Jan, 2013

456

"მიმართვა საქართველოს პრეზიდენტს, საქართველოს პრემიერ-მინისტრს, საქართველოს სახალხო დამცველსა და საქართველოს მთავარ პროკურორს, 14 იანვარს, პროკურატურის მიერ გავრცელებული ვიდეო-მასალის მიხედვით, ნათლად ჩანს, რომ ირღვევა ადამიანის კონსტიტუციით მინიჭებული და გარანტირებული ფუნდამენტური უფლება, პირადი ცხოვრების ხელშეუხებლობის შესახებ. ასოციაცია ლგბტ საქართველო (ლესბოსელ, გეი, ბისექსუალ და ტრანსგენდერულ) შეშფოთებას გამოთქვამს აღნიშნული კადრების გადაღების და შემდგომში გავრცელებასთან დაკავშირებით და მოვუწოდებთ საქართველოს პრეზიდენტს, როგორც საქართველოს კონსტიტუციის გარანტს, რეაგირება მოახდინოს აღნიშნულ საქმესთან დაკავშირებით და გამოიყენოს მის ხელთ არსებული ბერკეტები მსგავსი ტიპის კანონდარღვევისგან ჩვენი ქვეყნის ნებისმიერი მოქალაქის დასაცავად. ასევე მივმართავთ საქართველოს პრემიერ-მინისტრს, ბატონ ბიძინა ივანიშვილს და მოვუწოდებთ, რომ დააფიქსიროს, მისი პოლიტიკური გუნდის აზრი ამასთან დაკავშირებით და დაგმოს აღნიშნული ჰომოფობიური ქმედებები. ასევე, მიიღოს ყველა ზომა იმისთვის, რომ მისი პოლიტიკური გუნდის მმართველობის პერიოდში, სახელმწიფოს მხრიდან ადგილი არ ჰქონდეს მსგავსი ზეწოლის ფაქტებს და ქვეყნის უზენაესი კანონის დარღვევას. ასოციაცია ლგბტ საქართველო მიმართავს სახალხო დამცველს, უჩა ნანუაშვილს, რათა მან მოახდინოს რეაგირება და გამოიყენოს კანონმდებლობით მინიჭებული უფლებები, უზრუნველყოს რა, კანონით გათვალისწინებული პროცედურების ამუშავება. ორგანიზაცია ასევე მიმართავს საქართველოს გენერალურ პროკურორს არჩილ კბილაშვილს, რათა მან, ძალისხმევა არ დაიშუროს ამ საქმის გამოსაძიებლად. მიგვაჩნია რომ ჩვენს ქვეყანაში, ნებისმიერი ადამიანის პირადი და ინტიმური ცხოვრების დეტალები დაცული უნდა იყოს ყოველგვარი წნეხისა და ზეგავლენისგან, როგორც ეს არის გაწერილი ქვეყნის უზენაეს კანონში. მოვუწოდებთ პროკურატურას და სხვა სახელმწიფო უწყებას, რომელსაც გააჩნია მსგავსი სახის კომპრომატები, აკრძალოს მათი ჩაწერა, გავრცელება და გაანადგუროს არსებული ვიდეო, ფოტო, აუდიო კომპრომატები. გამოვლინდნენ ის ადამიანები რომლებიც ახორციელებდნენ, უკვეთავდნენ და სარგებლობდნენ აღნიშნული ვიდეო, ფოტო, აუდიო მასალით, ზეწოლისა და შანტაჟის მიზნით, რათა წარდგნენ სასამართლოს წინაშე და დაისაჯონ კანონის სრული სიმკაცრით"- ნათქვამია მიმართვაში.