აჭარის სახელმწიფო ანსამბლის დირექტორის გათავისუფლებას ითხოვენ

საზოგადოება - 20:27, 14 Jan, 2013

523

"ჩვენი მრავალგზის ცდის მიუხედავად, ვერ შევძელით ანსამბლის დირექტორთან ამირან პაიჭაძესთან და ქორეოგრაფ მარიკა სიხარულიძესთან გამოგვენახა საერთო ენა ჩვენი პრობლემების გადასაჭრელად. აღნიშნულიდან გამომდინარე, ანსამბლი მოცეკვავე-მსახიობებს გვსურს, რომ დაუყოვნებლივ გადაყენებულ იქნენ დაკავებული თანამდებობიდან, ქვემოთ ჩამოთვლილი მიზეზების გამო: სახელმწიფო ანსამბლის დირექტორი ანსამბლის განვითარების და წინსვლისათვის არანაირ ღონისძიებას არ ახორციელებს, პირიქით, ცდილობს როგორმე დაასუსტოს და შეამციროს დღეს ვინც მუშაობს და შემოიყვანოს მათ მაგივრად მისი აღზრდილი ბავშვები; ზეწოლას განიცდის მთელი სახელმწიფო ანსამბლი, რადგან პიროვნულად რაიმე თუ არ მოეწონება, მუქარას მიმართავს და თვითნებურად გვაკლებს ხელფასს; როდესაც ხდებოდა სახელმწიფო ანსამბლის დირექტორის დანიშვნა, ხელი მოგვაწერინა, რომ ყველანი მის კანდიდატურას ვეთანხმებოდით. ზოგიერთს ხელი არც კი მოუწერია, თუმცა როგორ და საიდან არ ვიცით, მაგრამ ხელმოწერილი აღმოჩნდა; ქორეოგრაფის თანამდებობაზე დანიშნა მისი ახლო მეგობარი მარიკა სიხარულიძე, რომელიც ჩვენი ქორეოგრაფი თუ იყო არც კი ვიცოდით, ვინაიდან რეპეტიციას დირექტორი გვიტარებდა და გავიგეთ კონცერტზე, როდესაც საჯაროდ გამოაცხადა. მარიკა სიხარულიძე როგორც ქორეოგრაფი არაკომპტენეტურია, არ აქვს უმაღლესი ქორეოგრაფიული განათლება და ამიტომ ქორეოგრაფის ფუნქციებს თავად დირექტორი ითავსებს; “ოცნების” მაისურის ჩაცმის გამო, პრობლემა შეუქმნა ჩვენს ერთ თანამშრომელს და გვემუქრებოდა, თუკი მსგავსად კიდევ ვინმე მოიქცეოდა, მთელი ანსამბლი მკაცრად დაისჯებოდა; როდესაც ციხეში მიმდინარე მოვლენების გამო გვინდოდა პატიმრებისათვის სოლიდარობის გამოცხადება, სახელმწიფო ანსამბლის სახელით გასვლა აგვიკრძალა და ვინც გაბედავდა აქციაზე გასვლას, ანსამბლიდან იქნებოდა გაშვებული; გვაიძულებდა, დავსწრებოდით “ნაციონალური მოძრაობის” ნებისმიერ აქციას, ადგენდა სიას და ვინც არ მივიდოდა, ხელფასის დაქვითით ან ანსამბლიდან გაშვებით გვემუქრებოდა; სახელმწიფო ანსამბლის დირექტორმა, ფეხმძიმობის გამო ორ თანამშრომელს დაუქვეითა კატეგორია ხელფასის განახევრების მოტივით, რაც დაუშვებელია საქართველოს მოქმედი კანონმდებლობით; არ მიმდინარეობს შემოქმედებითი განვითარება, არ ზრუნავს ანსამბლის მომავალზე რაც გამოიხატება შემდგომში, რომ არ დგამს ახალ ცეკვებს; აზრის გამოთქმის უფლება ფაქტობრივად გვეკრძალება და თუ არ მოეწონება ჩვენი გამოთქმული აზრი, ხელფასს გვიქვითავს; პრემიებს ანაწილებს მისი პირადი შეხედულებით და ნაცნობობით", - ნათქვამია წერილში.