უკრაინელი დეპუტატები რუსეთ-უკრაინის ომის ოფიციალურ აღიარებას ითხოვენ

მსოფლიო - 20:21, 10 Dec, 2014

1890

უკრაინის უმაღლესი რადას რამდენიმე დეპუტატი, რომლებიც დეპუტატობამდე მოხალისეთა ბატალიონებს ხელმძღვანელობდნენ, აპირებს უმაღლეს რადას ინიციატივით მიმართოს, რათა უკრაინის აღმოსავლეთ რეგიონში მიმდინარე მოვლენები ანტი ტერორისტული ოპერაციის ნაცვლად გამოცხადდეს, როგორც ომი რუსეთის ფედერაციასთან. ამის შესახებ დღეს ბატალიონს „დნეპრ1“-ის მებრძოლმა და ამჟამად რადას დეპუტატმა იური ბერეზამ განაცხადა.

"თავდაცვის კომიტეტი მოამზადებს მიმართვას, რათა საკანონმდებლო დონეზე გადაწყდეს, რომ უკრაინის აღმოსავლეთში ანტი ტერორისტული ოპერაცია კი არა რუსეთთან ომი მიმდინარეობს."- განაცხადა მან.

შეგახსენებთ აღმოსავლეთ უკრაინაში კონფლიქტი 2014 წლის აპრილში დაიწყო, როდესაც პრორუსი სეპარატისტების შეიარაღებულმა ჯგუფებმა დონბასის რეგიონის ქალაქებში ადმინისტრაციული შენობები და მილიციის განყოფილებები დაიკავეს.

უკრაინის ხელისუფლებამ საპასუხოდ აღნიშნულ რეგიონში ანტიტერორისტული ოპერაცია წამოიწყო, რომელიც მასშტაბურ სამხედრო კონფლიქტში გადაიზარდა.

ზოგიერთი უკრაინელი დეპუტატი და დასავლეთის ქვეყნების წარმომადგენელი ამ მოვლენებს უკვე უწოდებს „ჰიბრიდულ ომს“ .

გაეროს განცხადებით აპრილიდან დღემდე აღმოსავლეთ უკრაინაში 4 317 ადამიანი დაიღუპა , ხოლო 9 921 კი დაიჭრა.