თუ ვინმეს ბრალელულობა გამოიკვეთა, რა თქმა უნდა, მისი პასუხისმგებლობის საკითხი დადგება - ამის შესახებ თბილისის ვიცე-მერმა ალექსანდრე მარგიშვილმა განაცხადა.

მან მიმდინარე საგამოძიებო სამუშაოებთნ დაკავშირებით განმარტებაც გააკეთა და თქვა რომ, თბილისობათან დაკავშირებული ხარჯების შესწავლის თხოვნით პროკურატურაში დოკუმენტაცია მერიამ გადააგზავნა.

"მინდა გითხრათ, რომ დარღვევა არ არის, მაგრამ ჩვენი მიდგომაა, რომ როდესაც საზოგადოებაში ჩნდება კითხვები, არ დავტოვოთ ეს კითხვები უპასუხოდ და არსებობდეს კვალიფიციური პასუხები. თუ ვინმეს ბრალეულობის საკითხი გამოიკვეთა, დადგება მისი პასუხსიმგებლობის საკითხი", - განაცხადა მარგიშვილმა.

შეგახსენებთ, რომ პროკურატურამ თბილისობის დღესასწაულთან დაკავშირებულ შესყიდვების საქმეზე სამსახურებრივი უფლებამოსილების ბოროტად გამოყენებისა და მითვისება-გაფლანგვის მუხლებით გამოძიება დაიწყო.

„ქალაქ თბილისის მერიასთან დაკავშირებით გავრცელებული ინფორმაციის შესახებ, საზოგადოების ინფორმირების მიზნით მთავარი პროკურატურა განმარტავს, რომ თბილისის მერიასა და გამგეობებში არანაირი საგამოძიებო მოქმედება არ ჩატარებულა. მთავარ პროკურატურაში დაწყებულია გამოძიება 2014 წლის თბილისობის დღესასწაულთან დაკავშირებით განხორციელებული შესყიდვების კანონიერების შესწავლის მიზნით. ხსენებულ საქმეზე თბილისის მერია აქტიურად თანამშრომლობს გამოძიება, რის ფარგლებშიც მოხდება მათ მიერ შესყიდვასთან დაკავშირებით გადმოგზავნილი დოკუმენტაციის შესწავლა. გამოძიება დაწყებულია 332-ე მუხლის პირველი ნაწილით და 182-ე მუხლის მეორე ნაწილით“, - აცხადებენ პროკურატურაში.