ეროსი კიწმარიშვილის გარდაცვალების საქმესთან დაკავშირებით, თბილისის პროკურორის მიხეილ შაყულაშვილის განცხადებას, ზურაბ კიწმარიშვილი ეხმაურება.

მისი თქმით, ოჯახსა და პროკურატურას შორის შედგა შეთანხმება, რომ საქმის დეტალებზე საჯაროს საუბარი არ უნდა ყოფილიყო.

გარდაცვლილი ბიზნესმენის ძმისთვის მოულოდნელი იყო პროკურორის განცხადება, რომ საქმეზე საგამოძიებო მასალები უახლოეს პერიოდში გასაჯაროვდება.

„ორი კვირაა მოლოდინის რეჟიმში ვართ, რომ შეხვხვდეთ გამომძიებლებს და პროკურორებს და ვესაუბროთ იმასთან დაკავშირებით, თუ რა შეკითხვები და მოსაზრებები გაგვიჩნდა საქმის მასალების გაცნობის პროცესში. ვფიქრობდით, რომ იყო ბევრი დეტალი, რომელიც გამოძიებას უნდა შეესწავლა. თუ ისინი ფიქრობენ, რომ გამოძიება დასრულებულია, კი ბატონო, წარმოადგინონ ამის დასკვნა“, - განაცხადა „რუსთავი 2“-თან საუბრისას კიწმარიშვილმა.

თბილისის პროკურორის მიხეილ შაყულაშვილის განცხადებით, ეროსი კიწმარიშვილის გარდაცვალების საქმეზე გამოძიება უახლოეს მომავალში დასრულდება.