ყოფილი მსჯავრდებული აჭარის პოლიციის მთავარი სამმართველოს უფროსს დავით თამაზაშვილს დევნასა და შანტაჟში ადანაშაულებს. გიორგი ბერიძე, რომელიც წარსულში ქურდულ სამყაროსთან კავშირის გამო გაასამართლეს და ამ დანაშაულისთვის შვიდწლიანი სასჯელი მოიხადა კიდეც, საქართველოში უკრაინიდან თურქეთის გავლით დღეს დაბრუნდა. მისი წინასწარი მოთხოვნით, სარფის საბაჟოზე ბერიძეს ახალგაზრდა იურისტთა ასოციაციის წარმომადგენელი დახვდა. ამის მიზეზი კი აჭარის პოლიციის უფროსის, დავით თამაზაშვილის მუქარაა.

გიორგი ბერიძე "რუსთავი 2"-თან ინტერვიუში აცხადებს, რომ თამაზაშვილმა მას უკვე რამდენჯერმე აიძულა ქვეყნიდან წასვლა. მისივე თქმით, მას თამაზაშვილის წარმომადგენლები დღესაც დახვდნენ სარფის საზღვართან, თუმცა ადვოკატების ადგილზე ყოფნის გამო მასთან გასაუბრებას თავი აარიდეს. გიორგი ბერიძე ამბობს, რომ დავით თამაზაშვილი მას იარაღის ჩადებით და დაპატიმრებით ემუქრება.

ყოფილ მსჯავრდებულს საქართველოში ცოლი და სამი შვილი ჰყავს. ის ამჟამად ბათუმში იმყოფება და აცხადებს, რომ უკვე დაგეგმილი აქვს გარკვეული პრევენციული ღონისძიებები მისი უფლებების დასაცავად.

წყარო: rustavi2.com