ქუთაისში, ე.წ. საღორიას დასახლებაში მოხუცი ქალბატონი განსაკუთრებული სისასტიკით მოკლეს. 77 წლის ცაცა ლაგაძეს თავის არეში ბლაგვი საგნით რამდენიმე ნახეთქი ჭრილობა აღენიშნებოდა. ქალბატონი სახლში მარტო ცხოვრობდა და გამომდინარე იქიდან, რომ ადგილზე მისულ მეზობლებს სახლის კარი – ჩამოგდებული, თეთრეულის კარადა კი გაღებული დახვდათ, ეჭვი ყაჩაღურ თავდასხმაზე მიიტანეს. ამ ეჭვებს ამძაფრებდა იქვე მყოფი მომვლელის ნაამბობი, რომელიც მეზობლებს დაბეჯითებით უმტკიცებდა, რომ მოხუცი ქალბატონი სწორედ ყაჩაღების მსხვერპლი გახდა.

55 წლის ნელი ხაჟალიამ ცაცა ლაგაძესთან მომვლელად მუშაობა დაახლოებით ორი წლის წინათ დაიწყო. მანამდე ის თურქეთში მუშაობით ირჩენდა თავს. მისი ნაამბობი მეზობლებში ეჭვს არ იწვევდა, თუმცა მომვლელის აქტიურობამ, როგორც ჩანს, სამართალდამცავები დააეჭვა და არცთუ უსაფუძვლოდ. როგორც ადგილობრივები ყვებიან, პოლიციამ ეჭვი სწორედ ნელი ხაჟალიაზე მიიტანა.

„გარდაცვლილის ქალიშვილი იამზე საბერძნეთში მუშაობს. ცაცას ეს ქალი უვლიდა და იამზე უგზავნიდა ხელფასს საბერძნეთიდან. როგორც გავიგე, კონფლიქტი 5 ლარის გამო მოხდა. ორი ხუთლარიანი ჰქონია ცაცას და ერთი ხუთლარიანი მიუცია, პური მოიტანეო. ამ ნელის კი მეორე ხუთლარიანი მოუპარავს. ამაზე შეკამათდნენო. როგორ თუ 5 ლარის ქურდობას მაბრალებო, აგური აიღო და თავში ჩაარტყა ამ ქალსო. რამდეჯერმე აქვს ჩარტყმული. მთელი სახლი სისხლით იყო სავსე, დაჩეჩქვილი იყო საწყალი. ასეთი სისასტიკე არასდროს შეგვიმჩნევია და არ ვიცი, ასე რამ გაამწარა. როგორ შეიძლება 5 ლარის გამო, ასეთი რამ გააკეთო. საშინელებაა“, - ჰყვება „პრაიმტაიმთან“ საუბრისას გარდაცვლილის ახლობლები.

წყარო: პრაიმტაიმი