სასჯელაღსრულების სამინისტრო განცხადებას ავრცელებს

სამართალი - 13:51, 14 Jan, 2013

616

უნდა მიმართონ პრობაციის ეროვნული სააგენტოს მუდმივმოქმედ კომისიას, რომელიც დადგენილი პროცედურით განიხილავს ჩამორთმეული უფლებების ვადამდე აღდგენის და ჩამორთმევის ვადის შემცირების საკითხებს.

"ნარკოტიკული დანაშაულისათვის მსჯავრდებულმა პირებმა, რომლებზეც "ამნისტიის შესახებ" საქართველოს კანონი არ ვრცელდება, ანუ პირობითი მსჯავრისგან სრულად არ გათავისუფლდნენ ან სასჯელი მოხდილი აქვთ და ამიტომ ამნისტია არ ეხებათ, მაგრამ "ნარკოტიკული დანაშაულის წინააღმდეგ ბრძოლის შესახებ" საქართველოს კანონის საფუძველზე ჩამორთმეული აქვთ ცალკეული უფლებები და ამ უფლებების ჩამორთმევის ვადა არ გასულა, მოქმედი კანონმდებლობის მიხედვით, უფლება აქვთ მიმართონ პრობაციის ეროვნული სააგენტოს მუდმივმოქმედ კომისიას, რომელიც დადგენილი პროცედურით განიხილავს ჩამორთმეული უფლებების ვადამდე აღდგენის და ჩამორთმევის ვადის შემცირების საკითხებს. დაინტერესებულმა პირებმა უნდა მიმართონ მუდმივმოქმედ კომისიას შემდეგ მისამართზე: თბილისი, ყაზბეგის #42, სამინისტროს მისაღებში, სადაც ისინი დადგენილი ფორმის განაცხადს შეავსებენ. ზემოაღნიშნულმა პირებმა თან უნდა იქონიონ განაჩენის ასლი, პირადობის მოწმობის ასლი, სამხარაულის სახელობის ექსპერტიზის ეროვნული ბიუროს მიერ გაცემული დასკვნა ნარკოლოგიური შემოწმების გავლის შესახებ (ე.წ. 40 ლარიანი დასკვნა ხუთ ქიმიურ ელემენტზე.) კომისია შესაბამისი დებულების მიხედვით, პერიოდულად (როგორც წესი, თვეში ერთხელ) განიხილავს შემოსულ განაცხადებს და წარმოდგენილი დოკუმენტების, დანაშაულის სიმძიმის, განმცხადებლის პიროვნების და მის შესახებ არსებული მონაცემების გაანალიზების შემდეგ იღებს დასაბუთებულ გადაწყვეტილებას, მოთხოვნის სრულად ან ნაწილობრივ დაკმაყოფილების ან დაკმაყოფილებაზე უარის თქმის შესახებ", - ნათქვამია განცხადებაში.