ათენის პოლიციის წარმომადგენლებმა, მედიას დაკავებული ქართველების მიერ ჩადენილი მკვლელობის და სხვა დანაშაულების დეტალები გააცნეს.

მათი განცხადებით, დამნაშავეთა კვალს პოლიციამ მხოლოდ ერთი წლის შემდეგ მიაგნო. დაკავებულია 5 ბრალდებული, 2-ს კი პოლიცია ამ დრომდე ეძებს.

"2013 წლის 3 სექტემბერს კალითეას რაიონში პირველ სართულზე მცხოვრები 58 წლის მამაკაცი ნაწამები და მოკლული ვიპოვეთ. ის დაბმული იყო სკამზე და სასტიკად იყო ნაცემი. ის იყო ტავერნის მეპატრონე,“ - განაცხადეს პოლიციაში.

მათივე თქმით, საქმე ამავე პირების წინააღმდეგ, მკვლელობის გარდა, ფალსიფიცირებული სასმელების დამზადება-რეალიზაციის მუხლითაც არის აღძრული, რადგან ბრალდებულთა საცხოვრებელი ბინების ჩხრეკისას ნაპოვნია სპირტით სავსე კონტეინერები, რომლითაც ქართველები სასმელებს არალეგალურად ამზადებდნენ და ასაღებდნენ. ჩხრეკის შედეგად პოლიციამ კარის საკეტების გახსნისთვის საჭირო ინსტრუმენტებიც ამოიღო.

ბერძნული მედიის ცნობით, დაკავებულთაგან ერთი ქალია. ის ტავერნაში მუშაობდა. საგამოძიებო მასალების მიხედვით, სწორედ მან შეატყობინა სავარაუდო ბრალდებულებს, რომ ტავერნის მეპატრონე საკუთარი სახლის სეიფში დიდი რაოდენობით თანხას ინახავდა.

პოლიცია იმედოვნებს, რომ დანაშაულში ბრალდებული სხვა პირების დასაკავებლად ქართველი კოლეგები მათთან ითანამშრომლებენ.