"იმას ვერ დავთანხმდებოდი, რაც "იმედში" შემომთავაზეს"

"იმას ვერ დავთანხმდებოდი, რაც "იმედში" შემომთავაზეს" - ლევან ჯავახიშვილი:

ეს საინტერესოა - 10:48, 02 Dec, 2014

15350

პოპულარული ტელესახე, ლევან ჯავახიშვილი, დღესდღეობით უმუშევარია. ტელეკომპანია "იმედი" დატოვა, რადგან, როგორც "სარკესთან" ამბობს, არხის ხელმძღვანელების მიერ შეთავაზებული წინადადება მისთვის მიუღებელი იყო. არც ახალ სამსახურში გაუმართლა. ახალგახსნილ ტელეკომპანიაში მიიწვიეს, რომელიც ეთერში უნდა გასულიყო, მაგრამ არხის მუშაობა შეჩერდა და რეალურად როდიდან აიღებს სტარტს, არავინ იცის.
სამი შვილის მამა, გამოცდილი ტელეწამყვანი, რომელმაც ცოტა ხნის წინ მეორედ იქორწინა და ახალშექმნილ ოჯახზეც პასუხისმგებლობა აკისრია, რეალურად სამსახურის გარეშეა დარჩენილი. ისეთ არასტაბილურ ქვეყანაში, როგორიც საქართველოა, ყველას მოეხსენება, ეს რას ნიშნავს, ლევანიც რთულ მდგომარეობაში აღმოჩნდა. ახლა გამოსავლის ძიებაშია და, როგორც "სარკესთან" ამბობს, მზად არის, სხვადასხვა შეთავაზებები განიხილოს.
– ლევან, სოციალურ ქსელში გამოაქვეყნეთ წერილი, სადაც "იმედის" შემოქმედებით გუნდს ძალიან თბილი სიტყვებით დაემშვიდობეთ და არხი დატოვეთ. რა მოხდა, რამ გიბიძგათ, რომ წასულიყავით?
– შემოქმედებით ჯგუფს ახლაც იმავეს ვეტყვი. რამდენი ხანიც უნდა გავიდეს, იმ ადამიანებს, რომლებიც "იმედში" მუშაობენ, ჩემიანებად ჩავთვლი. მიმაჩნია, რომ მეც მათი გუნდის წევრი ვარ. რაც შეეხება წამოსვლის მიზეზებს, როდესაც არ ეთანხმები რაღაც–რაღაცეებში მენეჯმენტს, გაუგებარ მარკეტინგულ სვლებს, უნდა ადგე და წამოხვიდე. ეს ნორმალურია. ამაში სკანდალურს და განსაკუთრებულს ვერაფერს ვხედავ.
– არასწორი მენეჯმენტი, გაუგებარი მარკეტინგული სვლები – ეს ყველაფერი თქვენ შეგეხოთ?
– ახალ სატელევიზიო სეზონში იყო გარკვეული შემოთავაზებები, სადაც ჩემი თავი ვერ დავინახე. როდესაც საინფორმაციო გამოშვების სპორტის პროდიუსერობაზე არის საუბარი საინფორმაციოში, სადაც არ არსებობს სპორტული ბლოკი, ბუნებრივია, მისი პროდიუსერი ვერანაირად ვიქნებოდი. ელემენტარულად უხერხულად ვიგრძენი თავი ჩემს მეგობრებთან, განსაკუთრებით სანდრო გოჩიშვილთან, რომელიც სპორტს აშუქებს. ერთი სიუჟეტისთვის პროდიუსერი არ არის საჭირო.
– გამოდის, რომ საკუთარი თავი ამ არხზე ვეღარ დაინახეთ?
– სპორტული პროდიუსერის რანგში – ნამდვილად ვერა. ამ შემოთავაზებას იმ შემთხვევაში დავთანხმდებოდი, თუ არხზე დიდი სპორტული ტოქ შოუ გაკეთდებოდა. ქართულ სპორტში უამრავი პრობლემაა და ჩემს გამოცდილებას ამ მიმართულებით სიამოვნებით გამოვიყენებდი.
– თქვენი სიტყვებიდან ჩანს, რომ ძირითად საქმეს გაშორებდნენ და მხოლოდ სპორტული ბლოკის პროდიუსერობას გთავაზობდნენ.
– პრაქტიკულად ასე გამოვიდა.
– ანუ ეს იყო არხის მხრიდან ზრდილობიანი "ნახვამდის"?
– არა, უბრალოდ იყო სხვა შეთავაზება. მეც რომ ვიყო რომელიმე არხის ხელმძღვანელი, ჩემი ხედვა მექნება და ასევე მოხდა ამ შემთხვევაშიც. ადამიანებს ჩემთან მიმართებაში ასეთი ხედვა ჰქონდათ, სადაც ჩემი თავი ვერ დავინახე.
– ამ ყველაფრის მიმართ პროტესტი არ გაგიჩნდათ?
– არანაირი პროტესტი არ გამჩენია. სოციალურ ქსელში ვნახე ფრაზები, ლევანმა "იმედი" პროტესტის ნიშნად დატოვაო. ვერ ვხვდები, ასე გამძაფრება რატომ გიყვართ. ჩვეულებრივი მომენტია, როდესაც რაღაცაში ვერ ეთანხმები არხის მენეჯმენტს, უნდა ადგე და წამოხვიდე. მნიშვნელობა არ აქვს, ეს ტელევიზია იქნება, საფეხბურთო გუნდი თუ ჟურნალი.

წყარო http://sana.ge/