ამის შესახებ ინფორმაცია უკრაინის საგარეო საქმეთა სამინისტროს ფეისბუქგვერდზე ვრცელდება.

„გუშინ კანადის თავდაცვის მინისტრმა ნიკოლსონმა გვამცნო კანადის ხელისუფლების გადაწყვეტილება, უკრაინას 11 მილიონი დოლარის ღირებულების სამხედრო დახმარება გაუწიონ“ - ნათქვამია შეტყობინებაში.

მოსალოდნელია რომ კანადური თვითმფრინავი ბორისპოლის აეროპორტში 28 ნოემბერს ჩამოფრინდება, ტვირთს უკრაინის ელჩი ვადიმ პრისტაიკო აცილებს.

შეგახსენებთ, კანადის თავდაცვის მინისტრმა რობერტ ნიკოლსონმა რამდენიმე ხნის წინ განაცხადა რომ ოტავა უკრაინის პრეზიდენტის თხოვნის საპასუხოდ უკრაინის შეიარაღებულ ძალებს უსასყიდლოდ გადასცემს არალეტალურ სამხედრო აღჭურვილობას.

საქმე ეხება ტაქტიკურ საკომუნიკაციო სისტემებს, განაღმვისთვის საჭირო მოწყობილობებს, სამედიცინო ინსტრუმენტებს და ღამის ხედვის მოწყობილობებს.

გარდა ამისა, უკრაინული არმია 30 ათასი ჯარისკაცისთვის ზამთრის ტანსაცმელს მიიღებს. დახმარების საერთო ღირებულება 11 მილიონ დოლარს შეადგენს.