„ნაციონალური მოძრობა“ შინაგან საქმეთა მინისტრს საჯარო ინფორმაციის შესახებ კანონის დარღვევაში ადანაშაულებს და მის წინააღმდეგ სასამართლოში სარჩელი შეაქვს.

ამის შესახებ ჟურნალისტებთან საუბრისას, პარტიის წევრმა ირმა ნადირაშილმა განაცხადა.

მისი განმარტებით, მინისტრი ვალდებულია სადეპუტატო შეკითხვებს უპასუხოს, თუმცა ჭიკაიძე არაერთი თხოვნის მიუხედავად პარლამენტში არ მივიდა.

„არაერთი კითხვით მივმართეთ შინაგან საქმეთა მინისტრს. გვაინტერესებდა ინფორმაცია სამინისტროში გაცემულ სახელფასო დანამატებსა და პრემიებზე. არაერთი წერილის მიუხედავად ინფორმაცია ვერ მივიღეთ. ამის შემდეგი გზა არის ის, რომ პარტიამ უკვე სასამართლოში იჩივლოს. სარჩელი მომზადებული გვაქვს და ჩვენ ამ სარჩელს შევიტანთ. ვთვლით, რომ სახელფასო დანამატებსა და პრემიებთან დაკავშირებით შინაგან საქმეთა სამინისტროში სერიოზული პრობლემებია. მიუხედავად იმისა, რომ მინისტრმა ეს ინფორმაცია არ გამოგვიგზავნა, ჩვენ გვყავს ჩვენი წყაროები, რომლებიც ინფორმაციას გვაწვდიან“, - განაცხადა ნადირაშვილმა.