კომპანია "ენ სი სი"-ს გენერალურ დირექტორ გიორგი ქელბაქიანს კიდევ ერთი ბრალდება დაემატა

სამართალი - 11:05, 11 Jan, 2013

885

განცხადებას ,,ნიუპოსტი" უცვლელად გთავაზობთ.

"შინაგან საქმეთა სამინისტროს ანტიკორუფციულ დეპარტამენტში მიმდინარე გამოძიების ფარგლებში, კომპანია "ენ სი სი"-ს გენერალურ დირექტორ გიორგი ქელბაქიანს საქართველოს სსკ-ის 210-ე მუხლის მე-2 ნაწილის "ა" ქ/პუნქტითა და საქართველოს სსკ-ის 194-ე მუხლის მე-3 ნაწილის "გ" ქ/პუნქტით ახალი ბრალდება დაემატა. გამოძიებით დადგინდა, რომ 2009 წლის ბოლოს, გიორგი ქელბაქიანმა განიზრახა უკანონო და დაუსაბუთებელი შემოსავლის მიღება და ამ შემოსავლისათვის კანონიერი სახის მიცემა. განზრახვის სისრულეში მოყვანის მიზნით, გიორგი ქელბაქიანმა მოქალაქე ბესიკ პაპისმედოვისგან თბილისში, შავი ზღვის ქუჩა #6-სა და #8-ს შორის მდებარე, არასასოფლო-სამეურნეო 160 კვმ მიწის ნაკვეთი შეიძინა. აღნიშნულის თაობაზე, ქონებრივი უფლებამოსილების დამადასტურებელი დოკუმენტი შედგა, სადაც გიორგი ქელბაქიანმა ნასყიდობის საგნის ღირებულებად 300 000 აშშ დოლარი ყალბად დააფიქსირა, რეალურად კი, ბესიკ პაპისმედოვს 90 000 აშშ დოლარი, ხოლო შუამავალ რევაზ შავოშვილს 10 000 აშშ დოლარი გადაუხადა. ამ ხერხით, ანუ ქონებრივი უფლებამოსილების დამადასტურებელი ყალბი დოკუმენტის შედგენის გზით, გიორგი ქელბაქიანმა კანონიერი სახე მისცა უკანონო და დაუსაბუთებელ ქონებას - 200 000 აშშ დოლარის ოდენობით", - ნათქვამია შსს-ს განცხადებაში.

შსს-ს ინფორმაციით, ბრალდებული გიორგი ქელბაქიანის მიმართ აღკვეთის ღონისძიების შეცვლაზე გამოძიებას სასამართლოსთვის არ მიუმართავს.

"საქმეზე წინასასამართლო სხდომა დანიშნულია 2013 წლის 16 იანვარს. სხდომაზე აღნიშნულ საქმესთან ერთად ქელბაქიანის მიმართ წარდგენილი წინა ბრალდებაც განიხილება", - ნათქვამია შსს-ს განცხადებაში.